بالصور..فلاحو البحيرة: عصر"مرسى"موت وخراب ديار

موت وخراب ديار،هكذا تم وصف حال"الفلاح"المصرى عامة والبحراوى خاصة، بسبب ندرة مياه الرى واختفاء الأسمدة الكيماوية وفساد البذور الزراعية وارتفاع أسعار المبيدات، هموم كثيرة يعانى منها"فلاحى"محافظة البحيرة التى التقت بهم"بوابة الوفد"و أجرت معهم حوار على"نار"هادئة وأن كانت قلوبهم مشتعلة من كثرة"الديون"التى وعدهم الرئيس مرسى بسدادها ولكن لم ينفذ ما وعدهم به.
وقال رضا عبدالرسول"فلاح"أكد انهيار الزراعة قائلاً:"بصراحة حالنا يُصعب على الكافر، مش لاقيين"مية"نروى بها زرعنا اللى بيموت قدام عنينا ومش عارفين نعمل ايه ؟"و أضاف فريج صبحى قائلاً:"إذا كان احنا مش لاقيين مية دلوقتى أُمال هنعمل ايه بعد ما يبنوا"سد النهضة"ولا اسمه ؟ هى فين الحكومة بتاعتنا، هى ساكتة ليه، داحنا اتخرب بيتنا، أما أما فتحى متولى"مالك"تساءل : هو الجيش ساكت ليه على الخراب اللى احنا فيه ؟ عاوزينه ينقذنا قبل ما نموت احنا كمان من العطش، و أشار إلى أن لولا تركيب الفلاحين لماكينات المية"الارتوازى"اللى بتجيب من تحت الأرض كان اتخرب بيتنا من زمان !
بينما أشار فهيم محمد إلى أن الرئيس مرسى صدر قرار بسداد"ديون" الفلاحين لبنوك القرى ولحد دلوقت ما فيش مليم اتسدد، والمصيبة ان احنا استنينا ياما عشان الريس يوفى بوعده وينفذ قراره لكن مافيش فايدة و"الفوائد"زادت علينا فى البنك، يعنى خراب من كل ناحية واستطرد عبدالهادى عنبر فى الحديث مشيراً إلى سوء حالة"البذرة" الزراعية والمحصول ما بيجبش همه وبنخسر كل زرعة، ده غير ان ايجار الفدان وصل 6000 جنيه فى السنة، وما فيش انتاج ولا تسويق ومش عارفين نعمل ايه ونروح فين ؟
و أضاف فخرى خيرت متسائلاً : هو الرئيس مرسى فين من ده كله، والحكومة بتاعته فين ؟ ده حتى المبيدات زى قلتها و أسعارها غالية قوى، حنلاحقها منين ولا منين ؟ أما عادل البياع فقال ساخراً"الرئيس كدة، و أشار بإصبعه للأعلى والحكومة كمان كدة، احنا خلاص اتخرب بيتنا وخلاص".