(فيديو) ندى موسى تكشف تفاصيل نجاحها في "هجمة مرتدة وبين السما والأرض"

أكدت الفنانة ندى موسى، أنها تهتم بمتابعة مباريات كرة القدم، حيث أنها تشجع نادي الزمالك بسبب والدها، لكنها تفضل مباريات المنتخب الوطني لكرة القدم.
وعلقت "موسى" خلال مداخلة هاتفية ببرنامج "صباح الخير يامصر"، المذاع عبر فضائية " القناة الأولى"، اليوم الخميس، على نجاحها في مسلسلي "هجمة مرتدة"، و"بين السما والأرض"، قائلة إنهما كانا صعبين للغاية لأنها متناقضين، متابعة : "أنا بعيدة عن كل البعد عن دوري في مسلسل هجمة مرتدة، وحضرت كويس واتفرجت على حاجات كتير عشان أفهم أبعاد الشخصية، وبعد
شوية بدأت أفهم حاجات مكنتش فاهماها".
وتابعت : "مشاركتي في هجمة مرتدة نقلة نوعية في مشواري، خاصة إنه شبه الحاجات اللي كنا بنشوفها زي الاختيار ورأفت الهجان وعرفت حاجات مكنتش عارفها أو فاهماها، ربنا يكون في عون الناس اللي طول الوقت ده شغلها بس"، مضيفة :"وإحنا كنا بنصور هشام سليم خبط في الازاز مكنش واخد باله وايده اتفتحت وطلعنا بيه على المستشفى ورجع كمل تصوير عادي..
مصدقتش نفسي، الناس بدأت تاخد بالنا إننا بنتعب أوي مش مجرد بناخد كلام ونقوله خلاص".
وأشارت موسى إلى أن مسلسل بين السما والأرض كان يتم تصويره في الدقي الساعة 8 صباحا ، معقبة :"الدنيا كانت زحمة والناس متعاونة جدا، وكلنا كنا قلقانين لأنها تجربة اتعملت قبل كده والناس شايفاها وعارفاها، ومخرج المسلسل ماندو العدل كان أكتر واحد مرعوب فينا، وبالتالي الموضوع كان صعب جدا".
واستطردت أنها ستقضي العيد مع والدتها لأنها لم تزورها في شهر رمضان بسبب ظروف تصوير المسلسلين، لافتة إلى أنها ستشارك في فيلم، كما تصور مشروعا فنيا مع الفنانة هند صبري باسم "البحث عن علا"، وهو مرتبط بمسلسلها الشهير "عايزة أتجوز".