شباك علي الثورة

الله يرحمك يا شيخ زايد يا فارس الفرسان

فاجأنا عبده شمة بالسؤال الغريب التالي قال:
- الا جول لي ياعم أحمد؟
قلت:
- اجول لك طبعا يا حاج عبده انت تؤمر.
فقال الدكتور اشرف:
- اللهم اجعله خير.
فقال احمد القزعة:
- خير منين يا دكتور؟ هو الغيبوبة دي ممكن يجي الخير من نواحيه؟
فقال عبده شمه:
- وه ليه امال يا واكلهم؟ جالولك عني إني شيطان رجيم؟
فقال أحمد القزعة:
- ياريت دا الشيطان ده اكبر مخلوق بيفهم.
فقال عبده شمه:
- وي وي الشيطان بينهم؟ ليه عاد؟
فقال احمد القزعة:
- عشان بيشغل دماغه يا خبؤ.
فرد عبده شمة:
- واني اياك ما عا اشغلش دماغي واصل.
فقال الدكتور اشرف:
- ودا من حسن حظنا يا حاج عبده.
فقال عبده شمه:
- وي وي وي خبر ايه امال يا دكتور حتي انت كمان؟
وفوجئنا جميعا بالقزعة يغني بصوت جميل الاغنية الشهيرة
حتي انت كما تقسي عليَّ
حتي انت كمان
فين عطفك فين الحنية
فين الفستان
وانفجرنا ضاحكين فقال عبده شمة للقزعة:
- وي فستان ايه يا واكل ناسك؟
فقال الدكتور اشرف:
- هو ادري يا حاج عبده ما تحرجوش وبعدين فين السؤال اللي كنت عايز تقوله لعمك احمد؟
قال عبده شمه:
- هي يا دكتور دولة الامارات العربية اتحدت مع السعودية؟
قلت:
- في الكتم ممكن لكن انت بتسأل ليه يا حاج؟
قال:
- اصل عمر سليمان بعد ما زعطوه سافر يعمل عمرة وراح علي دبي وبسلامته الفريج شفيج بعد ماخاب في انتخابات الرئاسة سافر يعمل عمره برضك وراح علي ابو ظبي.
قال الدكتور اشرف:
- والله عفارم عليك يا حاج عبده انك هرشت المسائل دي.
فقال احمد القزعة:
- امال يا دكتور غيبوبة مش عبيط غيبوبة هو اللي شكله كدة، لكن دقرم يفهم الكفت.
قلت:
- الله يرحمك يا شيخ زايد يا فارس الفرسان لو كان عارف ان الامور حتوصل للدرجة دي ما كانش اساسا اسس الدولة دي.
فقال الدكتور اشرف:
- قال يعني مش كفاية عليها النظام الوهابي في الحجاز بيدعموه كمان بدبي وأبو ظبي وام ظبي.
قلت:
- ولا تنسي قطر الشقيقة التي تريد احتلال مصر المحروسة وحكم المصريين!!!