شباك علي الثورة

توكيل من ربنا!

دخول التليفزيون إلي مصر المحروسة سنة 1960 كان ايذانا بميلاد مجموعة من المواهب واحياناً العبقريات أمثال السيناريست النجم المرحوم اسامة انور عكاشة أو نجيب محفوظ، الشاشة الصغيرة كما كنت اسميه وهذا علي سبيل المثال لا الحصر حتي لا اقترف خطيئة النسيان
في حق فنانين كبار امثال يسري الجندي ومحفوظ عبد الرحمن مع حفظ الالقاب وغيرهما ممن لا تسعفني الذاكرة الآن لحفظ اسمائهم واما عن الاشعار والالحان المصاحبة للدراما التليفزيونية «التترات» فحدث ولا حرج ومازال رأيي حتي كتابة هذه السطور هو ان تتر ليالي الحلمية مازال يتصدر جميع التترات وأنا اسميه عمدة التترات.
ما تسرسبيش يا سنينا
من بين ايدينا
ولا تنتهيش
احنا يا دوب ابتدينا
كلام جميل زي أي كلام جميل في تترات الدراما التليفزيونية لكن اللي ملوش زي هو اللحن العبقري لهذه الكلمات البسيطة التي صاغها سيد حجاب بأسلوب الحوار و«فتح عينك تاكل ملبن» وفضلت افتش وأدور علي الملحن اللي عامل الجمال دا كله لقيت اسمه «ميشيل المصري» مين ميشيل المصري ده! لحد ما ذات يوم لقيت التليفون بيرن:
- الو مين؟
أنا ميشيل المصري..
- يااه.. أنا بصراحة المفاجأة خدتني لدرجة انا مش عارف لحد الان هل انا كلمته كويس؟ هل انا كلمته وحش وانتهت المكالمة دون ان ابدي له رغبتي الشديدة في ان التقي به وأراه وهكذا افلتت مني الفرصة الذهبية كما يحدث معي كثيراً واندم حيث لا ينفع الندم حتي قرأت في احدي الصحف.. تصريح لميشيل المصري تعليقاً علي الوصايا الدينية التي يريد البعض فرضها علي الشعب المصري بدون مناسبة! وكان رد ميشيل المصري علي هذا الهراء يشبه إلي حد بعيد لحنه الرائع لتتر ليالي الحلمية، عارفين قال ايه:
- اللي معاه توكيل من ربنا يطلعه.
تصدق وتؤمن بالله ياد يا ميشو إن الجملة دي كانت جوايا بحذافيرها لكن كانت عايزه حاوي يطلعها زي ما بيطلعوا الثعبان من الشق.
- اللي معاه توكيل من ربنا يطلعه واحنا بعد ما نشوف التوكيل ونقراه يبقي يخلق في قضاه رحمة وبالمناسبة باقول للاخوة تبع الاسلام السياسي:
احنا انتخبناكم عشان تخلوا لنا مشاكلنا مش عشان تعلمونا أصول العلاقة مع ربنا لان احنا بنمارس العلاقة دي من عصر اخناتون اول الموحدين يعني قبل الاديان السماوية ما تنزل علي الارض بآلاف السنين وما يصحش «البطة تعلم امها العوم» علي رأي المثل الشعبي البليغ فاشهدوا بالله كدة ولسة قدامكم فرصة تحاولوا تحلوا مشاكل الشعب المصري وبعدين نتكلم في كل الموضوعات وبمنتهي الحرية والاحترام وربنا يهدينا ويهديكم الي سواء السبيل.
يا رب هبت شعوب من منيتها
واستيقظت أمم من رقدة العدم
رأي قضاؤك فينا
رأي حكمته
اكرم بوجهك من قاضٍ ومنتقم
فالطف لأجل رسول العالمين بنا
ولا تزد قومه خسفاً ولا تسم
يارب احسنت بدء المسلمين به
فتمم الفضل وامنح
حسن مختتم