تحذير إلى كل " قفة " !

امبارح اتنين من أصحابي كلمونى .. كل واحدة حكت لى حبيبها قال لها ايه على اساس ان عقلى كبير وهعرف اوزن الامور واكتشف اذا كان الشخص ده بيكذب عليها ام لا – جابوا منين الاعتقاد ده محدش يسألنى
المهم بعد ما كل واحدة صدعتنى ساعة اكتشفت ان معظم الجمل اللى المفروض ان كل حبيب بيقولها لحبيبته " المغفلة " اتكررت .. وسبحان الله كأن الولدين اصحاب أو كاتبين السيناريو مع بعض .. وطار النوم من عينى وقلت لازم اعرف السر.
سألت 36 بنتاً مرتبطة عاطفيا عن اهم الجمل اللى بيقولها حبيبها واللى بتعلق فى دماغها .. وكان شكى فى محله وطلع الأولاد اللي بيضحكوا على البنات الغلابة حافظين كام جملة بتتكرر واللي بيختلف بس اسم البنت .. فقلت لازم اقول لكم اشهر الجمل دي .. فإلى كل " قفة " هانم " فنجلى " عينيكي وتابعي بتركيز....
-حبيبتى انتى عارفه انا مش بحب حركات الشباب " السيس " وعمرى ما اتكلمت مع حد براحتى غيرك
" وتلاقيه بيرتاح لطوب الارض"
- يااااه ياحبيبتى انا حاسس انى اعرفك من زمان
"وهو تلاقيه مش فاكر اتعرف عليها فين من كتر البنات اللى بيقرطسهم "
-حاسس ان فيكى حاجه غريبه غير كل البنات
"طبعا عندها شوية هبل زيادة عشان مصدقة الكلام الفاضى ده"
-مش ملاحظة ان تفكيرنا زى بعض .. احنا اكيد مخلوقين لبعض
"اكيد دى البنت رقم 100 اللى بيقولها كده "
-حبيبتى انتى اول حب فى حياتى وانا حاسس انى اتولدت يوم ما قابلتك
"على أساس ان أمه كانت حامل فيه 20 سنه وولدته قبل ما يقابلها بساعتين"
-يااه يا حبيبتى انتى تأمرى وانا انفذ .. لو عايزة لبن العصفور يكون عندك
"فى المشمش"
-حبيبتى الطقم ده تحفه عليكى بس متلبسهوش تانى عشان بتبقى حلوه وانا بغير عليكي
" تلاقيه مش طايقه اساسا"
-هكلم باباكى اول ما اكوّن نفسى
"موت يا حمار"
-حبيبتى افتكرى دايما انى لما بحب بحب بجد وانا حبيتك بجد من اول ماشوفتك وكنت بدور عليكى من زمااااااان
"قديم قديم يعنى"
-انا علاقتى بيكى محدش يعرفها غيرى و غيرك و ربنا ..
"طبعاً نسي يقول وكمان اخواته و اصحابه و جيرانه والأهل والاقارب فى سمالوط"
-ياه لما بشوف رقمك على الموبيل قلبى بيتنفض
"طبعا من الخضه انها تكون عرفت حقيقته "
-حبيبتى عايز صورتك عشان قبل مانام اشاهد فى جمالك واحطها تحت المخده
"عشان يا هبلة لما تتخانقوا يهددك بيها"
-عارفه يا حبيبتى انا اصلا مش بفتح الماسنجر الا لما بتكونى موجوده اصل النت من غيرك ممل جدًاً .
"يقصد مش بيفتح البلوك عنها الا اما تكون هى بس اللى اون لاين عنده"
الى كل قفة .. اقرئي الجمل كويس وبتركيز .. وأعرفى أيه آخرتها !