تفر دمعة العين علي حال مصر وشعب مصر. تفر دمعة العين علي الأداء السيئ لحكام مصر. تفر دمعة العين علي أسلوب التيارات الإسلامية الذي سيدمر مصر. تفر دمعة العين لما تشوف ناس بيفتكروا إنهم فقط المسلمون وإن البلد بلدهم ونحن ناس كفرة وضيوف عليهم في المساجد بيوت الله. تفر دمعة العين من أسلوب العمل السياسي في مصر واللوع والكدب والخداع. تفر دمعة العين لما تري المجلس العسكري عمال يمرجح في قفص الوطن لحد ما داخت الناس وتاهت بين الطرقات. تفر دمعة العين لما تري المواطن البسيط مش فاهم حاجة وإخوانا إياهم محاصرينه بكيس لحمة وكيس رز ومسواك..هوه فاهم حاجة واحدة بس إنه جعان وما صدق شاف اللحمة.. هي دي مش رشوة انتاخبية يا أخونا؟!! تفر دمعة العين لما تسمع خطيب من إياهم عمال يهدد ويتوعد زي ما يكون اشتري البلد بناسها.. إيه؟ اما تفوقوا أنتوا عايزين مصر تكون أفغانستان ثانية وإلا صومال ثانية.. حرام عليكم اتقوا الله!! تفر دمعة العين لما تجد شرف وحكومته السنية اللي بتبوظ الأعمال شغالة اجتماعات وتصريحات والبلد زي ما هيه والعة وخربانة..قاعدين ليه ما تقوموا تروحوا، كفانا حزلقة ونرجسية خدوا نفسكم وأقعدوا في البيت كفانا نفوس مريضة ووثيقة مريضة مرة وافقنا عليها بعشرين بند.. قوم الوازة والمجلس العسكري يزعلوا.. ويقولوا دول وافقوا .. زودوا بندين 9، 10.. عشان نعكنن علي القوي السياسية وقامت الدنيا ولم تقعد إلا بعد أن ملينوا التحرير. طبعا القوي السياسية المعتدلة لم تذهب التحرير لأننا ندرك خطورة الموقف وإن الناس خلاص فاض بيها وحتنفجر ثورة الجياع وثورة البلطجية. قوم المجلس العسكري ووزارة شرف يادي القرف.. ترجع في كلامها وتشيل المادتين 9، 10.. ما كان من الأول يا عالم يا ظلمة.. حتخربوا مصر.. هي إيه؟ حقل تجارب وبتجسوا النبض.. والله والله زهقنا وقرفنا. تفر دمعة العين لما تلاقي شباب مصر عمال يضرب في بعضه.. شباب من كل الاتجاهات مدنيين وشرطة وجيش وكل واحد فقد هيبته.. تخيلوا الناس بتحاول تقتحم وزارة الداخلية ومديريات الأمن.. الناس بتضرب في الشرطة بالطوب والشرطة بترد عليها بالطوب والقنابل المسيلة للدموع يا عيني عليكي يا مصر.. تعالوا نقعد جنب الحيطة لنسمع مصيبة الظيطة. تفر دمعة العين.. لما تلاقي الدولة علي وشك السقوط.. وكله من مماطلات المجلس العسكري وعدم تقنين الثورة وعدم إجراء التغيير وكمان حماية ودلع المخلوع وعيلته وشلته.. آخر دلع حد سامع عنهم حاجة اليومين دول.. آه ما هي المحاكم مغلقة والقضاة مضربين عن العمل.. يا حلاوة. تفر دمعة العين لما تلاقي الانتخابات تحولت إلي صراع بين الإخوان المسلمين والسلفيين وبين الكنيسة التي كان المفروض عليها ألا توجه بالأمر والسمع والطاعة أيضا المصريين المسيحيين لاختيار قائمة بعينها.. والله مصر حتدخل في خراب وصراع ديني. تفر دمعة العين لما تحس أن الثورة المضادة بيتخطط ليها بمعلمة وحرفية شديدة.. إيه يا مجلس يا عسكري أنت عايز تركب البلد والا عايز ترجع زميلك وحبايبك تاني؟!! الناس وأنا والكل كليلة مش فاهم مصر رايحة علي فين؟ والمصيبة إن ولاد مصر همه اللي بيعملوا فيها كدة.. لو كان الأعداء أو المحتلون والله والله مصر كانت أفضل بكثير جداً لما كانت محتلة من الإنجليز.. والله والله ما ضرب مصر إلا العسكر اللي احتلوها منذ عام 1952.. والله والله دمروا الشعب المصري ودمروا قيم الشعب المصري وحولوا مصر إلي عشوائيات وماريونتات ماشية تايهه والدموع تفر من العين عليك يا مصر. ----------- المنسق العام لحزب الوفد
