كفي دمعة العين علي حال مصر وشعب مصر. كفي دمعة العين علي الأداء السيئ لحكام مصر. كفي دمعة العين علي أسلوب التيارات الإسلامية الذي سيدمر مصر. كفي دمعة العين لما تشوف ناس بيفتكروا أنهم فقط المسلمون وأن البلد بلدهم ونحن ناس كفرة وضيوف عليهم في المساجد بيوت الله. كفي دمعة العين من أسلوب العمل السياسي في مصر واللوع والكدب والجذاع. كفي دمعة العين لما تري المجلس العسكري عمال يمرجح في قفص الوطن لحد ما داخت الناس وتاهت بين الطرقات. كفي دمعة العين لما نري المواطن البسيط مش فاهم حاجة وإخوانا إياهم محاصرينه بكيس لحمة وكيس رز ومسواك.. هوه فاهم حاجة واحدة بس إنه جعان وما صدق شاف اللحمة.. هي دي مش رشوة انتخابية يا أخونا؟!! كفي دمعة العين لما تسمع خطيب من إياهم عمال يهدد ويتوعد زي ما يكون اشتري البلد بناسها.. إيه؟! ما تفوقوا أنتوا عايزين مصر تكون أفغانستان ثانية وإلا صومال ثانية.. حرام عليكم اتقوا الله!! كفي دمعة العين لما تجد شرف وحكومته السيئة اللي بتبوظ الأعمال شغالة اجتماعات وتصريحات والبلد زي ما هية والعة وخربانة.. قاعدين ليه ما تقوموا تروحوا، كفانا حزلقة ونرجسية خدوا نفسكم وأقعدوا في البيت كفانا نفوس مريضة ووثيقة مريضة مرة وافقنا عليها بعشرين بند.. قوم الوزارة والمجلس العسكري يزعلوا.. ويقولوا دول وافقوا.. زودوا بندين 9، 10 عشان نعكنن علي القوي السياسية وقامت الدنيا ولم تقعد إلا بعد أن ملينوا التحرير. طبعا القوي السياسية المعتدلة لم تذهب التحرير لأننا ندرك خطورة الموقف وإن الناس خلاص فاض بيها وحتنفجر ثورة الجياع وثورة البلطجية. قوم المجلس العسكري ووزارة شرف يادي القرف.. ترجع في كلامها وتشيل المادتين 9، 10 ما كان من الأول يا عالم يا ظلمة.. حتخربوا مصر.. هي إيه؟ حتي تجارب وبتجسوا النبض.. والله والله زهقنا وقرقنا. كفي دمعة العين علي تلاقي شباب مصر عمال يضرب في بعضه.. شباب من كل الاتجاهات مدنيين وشرطة وجيش وكل واحد فقد هيبته.. تخيلوا الناس بتحاول تقتحم وزارة الداخلية ومديريات الأمن.. الناس بتعذب في الشرطة بالطوب والشرطة بترد عليها بالطوب والقنابل المسيلة للدموع يا عيني عليكي يا مصر.. تعالوا نقعد جنب الحيطة لنسمع مصيبة الظيطة. كفي دمعة العين.. لما تلاقي الدولة علي وشك السقوط.. وكله من مماطلات المجلس العسكري وعدم تقنين الثورة وعدم إجراء التغيير وكمان حماية ودلع المخلوع وعيلته وشلته.. آخر دلع حد سامع عنهم حاجة اليومين دول.. آه ما هي المحاكم مغلقة والقضاة مضربين عن العمل.. يا حلاوة. كفي دمعة العين لما تلاقي الانتخابات تحولت إلي صراع بين الإخوان المسلمين والسلفيين وبين الكنيسة التي كان المفروض عليها ألا توجه بالأمر والسمع والطاعة أيضا المصريين المسيحيين لاختيار قائمة بعينها.. والله مصر حتدخل في خراب وصراع ديني. كفي دمعة العين لما تحس أن الثورة المضادة بيتخطط ليها بمعلمه وحرفية شديدة .. إيه يا مجلس يا عسكري أنت عاجز تركب البلد وإلا عايز ترجع زميلك وحبايبك تاني؟!! الناس وأنا والكل كليلة مش فاهم مصر رايحة علي فين؟ والمصيبة إن ولاد مصر همه اللي بيعملوا فيها كدة.. لو كان الأعداء أو المحتلين والله والله مصر كانت أفضل بكثير جداً لما كانت محتلة من الإنجليز.. والله والله ما ضرب مصر إلا العسكر اللي احتلوها منذ عام 1952.. والله والله دمروا الشعب المصري ودمروا قيم الشعب المصري وحولوا مصر إلي عشوائيات وماريونتات ماشية تايهة والدموع تفر من العين عليكي يا مصر. ---------- المنسق العام لحزب الوفد