"خالد سعيد": العصيان مش خيانة للوطن

اعترضت صفحة "كلنا خالد سعيد" على تخوين من سيشارك في العصيان المدني غدا السبت – في ذكرى تنحي الرئيس المخلوع حسني مبارك- وأكدت أن الإضراب أداة سياسية سلمية مشروعة حسب المعاهدات الدولية للمطالبة بتسليم السلطة وإنهاء حكم العسكر في مصر.
وقالت الصفحة :"من حق أي فصيل معارضة فكرة الإضراب أو مساندتها، الاضراب في النهاية أداة سياسية، المؤيدين شايفين إنه وسيلة سلمية للمطالبة بإنهاء الحكم العسكري لمصر والتعجيل بانتخابات الرئاسة، والمعارضين شايفين إن الإضراب فكرة ستضر بالاقتصاد وستهدد مسيرة الديموقراطية".
وتابعت :"في النهاية كلنا مصريين وكل واحد شايف وجهة نظره هي الصحيحة ولكن الخط الأحمر للجميع هو أننا منحولش القضية لتخوين اللي بيشارك أو اللي بيرفض المشاركة، الاضراب قانونيا وحسب المعاهدات الدولية أمر مشروع، وفي الآخر هو مش إجباري واللي مقتنع بيه هيشارك فيه واللي مش مقتنع مش هيشارك، بلاش نحول الخلاف السياسي لتخوين ومزايدة على مين بيحب مصر".
ووجهت "كلنا خالد سعيد" التي اقترب عدد أعضائها من مليوني عضو رسالة لمن يهاجم ويخون من يؤمن بفكرة الإضراب ويريد المشاركة فيه قائلة فيها :"اعلموا إننا مش بيحركنا إلا حب البلد، وأما بخصوص تخوينكم لينا واتهاماتكم لينا بالعمالة والتكفير، فكل اللي نقدر نقوله ليكم إن ده مش هيوقف أي مصري نفسه بلده تتغير مهما كان الثمن حتى لو كان إن الواحد يموت عشان أولاده يشوفوا مصر ديموقراطية وفي النهاية ربنا يسامحكم".