كلام مسئول

محمد صلاح: يامساء الخير العلاقة بين مصر وامريكا نوصفها ازاي يعني عادية ولا على سطح صفيح ساخن لسه ماما امريكا ولا بنقولها كده م عبيد هاللو اميريكا ونسيبها ونمشي امريكا وفي ظل حكم الحمائم بعد الصقور لسه جامده وايديها سواء الاصابع الخشنة ولا القفازات الناعمة امريكا كشرت شوية في اسرائيل نتنياهو فدخل على مفاوضات غير مباشرة مع الفلسطينيين حتى العرب اللي كانوا مش مقتنعين قوي بحكاية المفاوضات غير المباشرة وافقوا عليها وادوا الضوء الاخضر لابو مازن وادخل من غير جشع عشان القضية تتحل والامور تمشي الرئيس الاميريكي باراك اوباما اللي ما بقاش جديد دا بقاله ييجي سنة ونص جه من سنة هنا في مصر جه المنطقة شاب مهذب محترم متحدث جيد جدا وايا طيبة وخد على حكاية النوايا دي جايزة نوبل جه القاهرة والقى كلمته الشهيرة من جامعة القاهرة العريقة كانت قدامه اختيارات تانية كتير لكنه اختار مصر وعاصمتها رحبنا بيه حتى الناس اللي اتقفلت محلاتها واتعطلت ارزاقها يوم ماجه واتمشى وراح جامع السلطان حسن ومنطقة الاهرامات مع الدكتور زاهي حواس الناس ما زعلتش دي امريكا دا اوباما اللي شعبيته هنا وفي مناطق كتيرة من العالم مخا تقلش عن شعبيته في امريكا نفسها الهوس باوباما الحلم بيه وعوده البراقة جدا اللي اطلقها من جامعة القاهرة لدرجة ان كلمته وهو الخهطيب المفوه اتقطعت كذا مرة بالتصفيق مفيش رئيس امريكي جه مصر الا وخد له بيتين شعر في جنابه فاكرين نيكسون وشرفت يانيكسون وبعده كارتر ووبوش ..ياترى اوباما اخباره ايه اتحققت وعوده في الكلمة اللي قالها في القاهرة اوباما وامريكا موضوع هيكون لينا عنه النهارده كلام مسئول
فاصل
محمد صلاح: ارحب بخبيرة الشئون الامريكية الدكتورة في الجامعة الامريكية الدكتورة منار الشوربجي منورانا يادكتورة بعد سنة تقريبا من الخطاب باراك اوباما في جامعة القاهرة ايه اللي اتحقق منه من وعوده البراقة
د/منارالشوربجي-خبيرة في الشئون الامريكية: طبعا فيه حاجة مهمة حصلت وهي وجود رئيس جديد كان العالم كله بيتنفس الصعداء
محمد صلاح: لمجرد ان بوش مشي؟
د/منارالشوربجي : بالظبط حتى فكرة ان هو اخد نوبل من غير ما يعمل أي حاجة الكرة الوحيدة اللي على اساسها انه خد نوبل انه الحمد له ان انت مش بوش قلت كلام كويس طيب الحمد له
محمد صلاح:قيل ساعتها ان اوباما خد نوبل على النوايا الطيبة
د/منارالشوربجي :بالظبط كده.. وانا رايي خدها لانه مش بوش لان العالم كان مستاء من ادارة بوش وفيها الكثير من الجدل وفي الحقيقة بوش مش بس استعدى خصوصا انه استعدى مش بس اعداء امريكا ولكن اصدقائها ايضا فكان فيه نوع من الغطرسة في التعامل مع اوربا وايضا العالم العربي الاسلامي فيها غطرسة وبالتالي دا ساب ادى للناس الفرصة ان هو مستعدين يعطوا الرئيس الجديد يعمل ايه
محمد صلاح:عمل ايه؟
د/منار الشوربجي : الحقيقة انه ماعملش كتير لانه فيه اسباب كتير جدا هو مهما قال ومهما عمل طالما انه الولايات المتحدة لم تضع نفسها في موقف حل القضية الفلسطينيةومازالت تحتل العراق الناس مش هتبقى راضية عنها وخصوصا انه كان فيه استطلاع راي ان اوباما شعبيته في اوساط المصريين ضعفت والمشكلة انه الولايات المتحدة بتدفع تمن ما تفعله اسرائيل يعني تعليق الولايات المتحدة على اسطول الحرية كان موقف باهت
محمد صلاح: احنا كنا متفائلين اكتر من اللازم ولا الوعود الوردية كان تطبيقها على ارض الواقع
د/منارالشوربجي :لا كان فيه حالة هوس واللي ساهمت فيها وسائل الاعلام الامريكية ان هو المنقذ اللي هينتشل العالم والناس داخل امريكا نفسه كانوا عاوزين يسمعوا اللي هما عاوزين يسمعوه مش وعود اوباما والحقيقة انا كتبت ان الامل في اوباما نفسه مش في حركة اوباما يعني امريكا دولة محافظة بدات تتجه يمينا منذ 4 عقود واكنوا محتاجين لحاجة تعدل الدفة في امريكا الحاجة الوحيدة اللي هي وجود حركة تقدمية تدفع الرئيس الامريكي
محمد صلاح:بالنسبة للقضية الفلسطينية وما تاحققش كتير ليه بقى ؟
د/منارالشوربجي :انا في رايي انه فيه جانب من الموضوع انه حالة الهوس وكان فيه توقعات مالها أي اساس موضوعي يعني في برنلامجه مكانش بيقول حاجة لكن الجديد ان حركة اوباما لو نظمت نفسها بحيث انها تضغط عليه بحيث يبقى فيه توازن اللي حصل ان الحركة دي ما نظمتش نفسها تاني حاجة انه في العلام العربي احنا لازم نكون واضحين اولا اوباما ماعملش وعود في خطاب جامعة القاهرة هو قال كلام مهم منه عن تجميد الاستيطان وقال ان الاستيطان غير شرعي وكانت اول مرة من 20 عاما يبقى فيه رئيس امريكي يتكلم كده فلما هو بيطالب بكده يبقى لازم ةعلى المستوى العربي يجب ان نعمل دا لكن لما الرئيس الامريكي يقول دا ويلاقي ان العرب مش عاملين دا
محمد صلاح:احنا كعرب قصرنا في حق انفسنا
د/منارالشوربجي :صحيح وانه طول ما فيه ضعف عربي انا مش هتوقع من الرئيس الامريكي انه يكون عربي اكثر من العرب هو مش جاي يدي هدايا مجانية الحاجة التانية فاضل شهور قليلة على انتخابات الكونجرس وبالتالي ما تتوقعش انه ياخد أي موقف وخصوصا ان حزبه في مأزق وهو مش عاوز يخسر أي عضو في حزبه لان الجمهوريين واخدين منه موقف ورافضين التعامل معاه في كل القضايا وفيه اعضاء من اشد المؤيدين لاسرائيل
محمد صلاح: اذن لا نتوقع من اوباما تحسن تجاه القضايا العربية ؟
د/منارالشوربجي :اذا لم يكن هناك تغير في الموقف العربي فلا تتوقع لا من اوباما ولا من غيره اوباما رئيس انتخبه الامريكيون عشان يحقق مصالح امريكا
محمد صلاح: بالنسبة للعلاقات المصرية الامريكية بين شد وجذب في عهد الادارة السابقة هل الموضوع اتغير بادارة اوباما ولا نفس القصة ؟
د/منارالشوربجي : لا طبعا حصل تحول لان الادارة اللي قبل دي كانت ادارة ايدلوجية بتاخد بناء على قناعات فكرية لكن دي براجماتية يعني واقعية مش واقعية بقدر انه البراجماتية فلسفة الفكرة الاسايسية انه مش بيركز على الخلافات ولكن بيركز على الفرص وايه الاوجه اللي بيتم من خلالها التعامل من اجل تحقيق المصالح ودا لا يخص مصر تحديدا وانما على كل السياسة الخارجة الامريكية والفترة الاولى منم حكم اوباما كانت لمحاولة راب الصدع في العالم كله
محمد صلاح: من كام اسبوع كان فيه اجتماع للمصريين الامريكيين البعض خون اللي شاركوا في المؤتمر وقال عليه عار والبعض اداهم الحق كمصريين معاهم الجنسية المصرية لمناقشة كمشاكل مصر هل تعتقد ان دا كنموذج يسئ للعلاقات المصرية الامريكية او بيؤثر عليها من جانب طرف تجاه طرف اخر يعني ممكن الادارة المصرية تتضايق شوية او تزعل من كده هل ممكن الادارة الامريكية تستغلها لكي تنفذ الى الداخل المصري او تكشف بعض الامور؟
د/منارالشوربجي :انا مش مع تخوين أي مصري انا متصورة ان الحكومة المصرية لم تخون احدا وليس منه النظام المصري هذا النو م الخطاب ممكن ان يسئ الى العلاقات المصرية الامريكية وخصوصا انها كانت واضحة انها لن تستخدم الديموقراطية اداة لابتزاز النظم ودا كان موجود في ادارة بوش الحقيقة انا بستغرب لما ناس يقولك اصل ادارة اوباما تراجعت عن ودعم الديموققارطية وانه بوش كان بيدعم الديموقراطية
محمد صلاح:يعني لما كانت كونداليزا رايس بتيجي هنا وتقعد مع بعض الناشطين في الاحزاب او المجتمع المدني في واشنطن ويبحثوا في امور تخص الاصلاح كنت شايفة ان تدخل ولا الغاية تبرر الوسيلة ولا الغرض مغرض في الاصل؟
د/منارالشوربجي :انا في الحقيقة عمري ماصدقت الحدوتة بتاعة ان امريكا جاية تدعم الديموقرايطية وواضح ان اناس فعلا ما بتقراش تاريخ امريكا يعني من امتى امريكا بتدعم الديموقراطية في الهعالام مقدر ش اقول اللي عايز يعرف تاريخ امريكا يشوف تاريخها في امريكا اللاتينية او لما قلبت نظام مصدق في ايران او تشيلي الحقيقة سجلها اسود في دعم الديكتاتورية وبالتالي الحديث عن انه ادارة بوش كانت بتدعم الديموقراطية كلام ليس له اساس من الصحة ادارة بوش كانت بتستخدم اليموقراطية كاداة لابتزاز نظم سياسية بعينها من اجل الضغط لاتخاذ مواقف اقليمية لا علاقة لها بالديموقراطية
محمد صلاح: يعني كان مطلوب من مصر موقف معين تجاه ايران او القضية الفلسطينية فكان يتم اللعب بقضية الديموقراطية او الاصلاح؟
د/منارالشوربجي : طبعا ولو انت تفتكر كان ايامها موضوع الانفاق كان فيه كلام في الكونجرس حوالين موضوع الانفاق وكان هناك ضغوط ولا علاقة لها بقضية الديموقراطية وبالتالي اللي عمله اوباما انما هو انه اعاد السياسة الخارجية الامريكية الى ماكنت عليه وهو تعاملها مع السياسة الخارجية وفقا للمصالح
محمد صلاح: هل اتغيرت نظرة المصريين عن بداية فترة حكم اوباما؟
د/منارالشوربجي :بالتاكيد وانا متصورة انه بعد اللي حصل مع اسطول الحرية مش بس اساء للموقف المريكي على المستوى المصري ولكن على المستوى العربي والاسلامي لان الموقف اللي اخدته باهت ليس له الجديد في الموضوع هو ان الموقف الامريكي تم انتقاده من داخل الادارة الامريكمية نفسها يعني من كام يوم في افتتاحية النيويورك تايمز بتعتبر ان الموقف اللي اخدته ادارة اوباما موقف هي عبرت عنه واعتبرت ان هذا الموقف لا يليق بالولايات المتحدة لانها جريمة ضد القانون الدولي لانها حصلت في المياه الدولية وكمان قتل المدنيين من مختلف الجنسيات جاءوا فقط لتقديم المساعدات ولذلك من المهم انه لما نبص على الصورة على الساحة السياسية وعلى مستوى النخبة ان نلقي عليه الضوء كتير من كتاب العواميد والراي اللي عمرهم ماعرف عنهم انهم مؤيدين لعرب كتبوا انتقادات شديدة في هذا الموضوع وانتقاد للولايات المتحدة لان دا خطاب جديد ان المصالح الامريكية ليست بالضرورة متطابقة مع المصالح الاسرائيلية
محمد صلاح:ان ادارة امريكية ممكن تصدق ان سياستها نابعة من السياسية الاسرائيلية وبالتالي تبدا تقتنع وتغير من سياستها؟
د/منار الشوربجي : انا متصورة انه الحل في هذا الموضوع انه لن ياتي من أي حكومات يعني انا براهن في الحقيقة على المجتمع المدني العالمي اللي هو اتحرك وحط قضية غزة النهارده على قائمة الدولية اسطول الحربة ركز الضوء على الجريمة الاسرائيلية
محمد صلاح:بس المحجتمع المدني على طول حاطط القضسيية الفلسطينية تحت الضوء من جنين الى المذابح وبرضه محصلش حاجة المواقف هي هي
د/منارالشوربجي :الحاجة الاولانية عايزة افكرك ان اللي قضى على جنوب افريقيثا العنصري كان حركة مدنية عالمية عملت مقاطعة لهذا النظام واجبرت الحكومات اجبارا انها تغير مواقفها فاضطران هذا النظام العنصري ان يسقط وبالتالي انا مش عايزة ان احنا نبص للحركة المدنية العالمية التي تحاول نزع الشرعية عن الاحتلال الاسرائيلي ان احنا نقلل من شانها هي لسه في بدايتها لما تبص حضرتك تلاقي الاكاديميين الاسرائيليين ليقاطعوا اسرائيل لما تلاقي اتحادات عمالية في العالم كله بتقاطع ىاسرائيل فيه مطالبة على العقوبات على اسرائيل جامعات في امريكا بتقاطع الشركات متعددة الجنسيات الامريكية زي جنرال اليكتريك لانها بتدعم الاحتلال الاسرائيلي ..تاني حاجة انه الضغط على الحكومات مش هييجي غير من المجتمعات المدنية بتاعتها
محمد صلاح: يعني المجتمع المدني والحركات الشعبية تضغط على المجتمع الدولي والاقطار نفسها؟
د/منارالشوربجي :عايزة اقول ان ادارة اوباما بدات تتاثر بالكلام دا اخر خطاب لهيلاري كلينتون في ايباك كل الناس عندنا هنا ركزت على ان امن اسرائيل المقدس هي قالت فقرة لايباك وهي منظمة ايهودية قالت ان انا دلوقت فيه فرق كبير جدا من ايام ماكنت قريبنة الرئيس وبيني دلوقت كوزيرة خاترجية زمان كنت بروح اماكن بعيدة عن الشرق الاوسط نادرا ماكنت بسمع كلمة عن القضية الفلسطينية دلوقت لما بروح في أي حتة من امريكا اللاتينية او اسيا الا لما يكون السؤال الاول او التاني عن القضية الفلسطينية وبالتالي هذا الموقف يعمله المجتمع المدني العالمي بتركيزه وتسليطه الاضواء على هذه الجرائم بيضغط على هذه الحكومات وهذا بيصل الى الحكومات اللي واقفة جنب اسرائيل وما تنسساش ان مانيلا كان بيسمى ارهابيا في امريكا الى ان الغي هذا بقرار من الكونجرس من سنتين بس وبالتالي هذه الحكومات انا اعول على الشعوب
محمد صلاح: يعني ما نتفائلش قوي بخطاب اوباما سواء اوباما او التصريحات الصادرة عن مسئولين امريكيين وحضرتك رصدت انه لازم المجتمع العربي والاسلامي يتغير الاوزل سواء بالحركات النشطة على المستوى الدولي او القطري خليك معايا لسه الكلام مخلصش
فاصل
محمد صلاح: دكتورة منار عندنا انطباعات لبعض الناس عن مشاعرهم بعد سنة من خطاب اوباما نسمعه
فاصل
مواطن1: السياسة الامريكية بالنسبة لمصر ما اتغيرتش وبقي الوضع على ماهو عليه ولما جه الرئيس الامريكي وقال كلام جميل بس انا شايف ان مفيش حاجة اتغيرت في السياسة الامريكية
مواطنة2: كان فيه استقرار شوية عن ايام بوش اللي كانت الحالة منعدمة والاستقرار بايظ
مواطن3: الفترة بتاعة اوباما غير الفترة بتاعة بوش خالص الفترة دي اتحسن بكتير
مواطن4: مش حاسس باي تغير العلاقات هي هي والاقتصادية كمان مش حاسس بتغيير باي حاجة يعني
مواطن5: حصل حاجات بس مش باينة لينا حصل حاجات داخلية او عسكرية ولكن كنا متوقعين انه يحصل اصلاح سياسي
مواطن6: انا شايف ان اوباما لازم يغير في السياسات كتير الى حد ما
مواطن7: هو مش التغير اللي كنا متوقعينه بس هو وعد بتغيير في الشرق الاوسط
مواطن8: ما اتغيرتش بس شرف كبير لمصر لما اوباما يجي هنا جامعة القاهرة وييجي مصر في تجمع كبير من الناس بس انا شايف ان مصر ما اخدتش خطوة مجدية من ساعة ما اوباما جه مصر
مواطن9: انا شايف ان كله كلام قدام الناس عاوز يبين ان هو رجل محافظ وعاوز يحافظ على الامن والاستقرار في الشرق الاوسط لكن كل حاجة زي ماهي
فاصل
محمد صلاح: دكتورة منار الناس مرتاحة لانه no news is good news هو ماحصلش حاجة سيئة بس مافيش حاجة ايجابية وصلت المسالة انه طالما لا يحدث شئ سئ من جهة كما فدا شئ كويس
د/منارالشوربجي :فيه حد اشار للاحتلال زي ماهو الاحتلال في العراق وفي فلسطين وبالتالي دا مسالة مهمة وعشان دا الكلام اللي انت قلته بالتحديد انه طالما ما بيعملش كوارث يبقى الحمد لله يبقى احسن من بوش عشان كده انا بعول على الشعوب مش على الحكومات لان موقف الحكومات زي ماحضرتك شايف
محمد صلاح: ملف المعونة الامريكية مثلا الموجهة الى مصر بعد معاهدة السلام واخد شكل الخط البياني على المستوى السياسي يتم استخدامه للضغط سياسيا او اعلاميا للترهيب بانها ستقطع انت شايفة ان ملف المعونة ممكن ينضب الى ايه؟
د/منارالشوربجي :في الحقيقة المعونة لمصر تم تخفيضها لافعلا وعلى مراحل وانا قناعتي الشخص مدركين ان الجانب الامريكي لما بيحطوا الفلوس دايما بينسوا ان المقابل كان اسمرا رمصر في معاهدة السلام
محمد صلاح: يعني مسالة متعلقة بالتنمية عشان ما يحصلش انه الناس تعتب على المعاهدة؟
د/منارالشوربجي : انما كان الهدف الاساسي منها هو ضمان ان الطرفين يفضلوا داخل المعاهدة اللي اعتبرتها امريكا انجاز بالنسبة لها اول دولة عربية انما المسالة التانية انا شايفة ان المعونة بتستخدم سياسيا في مكان في العالم أي دولة بتدفع معونة لدولة اخرى بتبقى فيه جانب سياسي لان هذه الدول في واقع الامر دول مش جمعيات وبالتالي لها اهداف سياسية وبالتالي بينظر اليها على اعتبار انها احد ادوات صنع السياسة الخارجية ولكن فيه اختلاف ثقافي بيؤدي الى مشكلة في احيان كثيرة لما بيكون فيه التنغمة اللي او الخطاب
محمد صلاح: بيعايرونا كتير يادكتورة
د/منارالشوربجي : بالظبط
محمد صلاح: اذا كان الهدف نبيل من الاساس وفيه رغبات امريكية بتقليص المعونة ليه مفيش جهود او سياسات حقيقية ما بين القاهرة وواشنطن انه تتحول المعونة الى مشروعات منتجة ويستفيد منها؟
د/منارالشوربجي : للامانة فيه ولكن متوى ضعيف والمؤتمر الاخراني الي عمله اوباما اللي هو الاستثمار في العالم الاسلامي انا كانت مشكلتي مع هذا المؤتمر انه مش واخد صورة الندية بين الولايات المتحدة والعالم الاسلامي واخد طابع الابوية انه امريكا هي الي بتقول لدول اقل منها وباتالي دا جزء من مشكلة الولايات المتحدة في التعامل مع العالم الاسلامي فيه نوع من التذمر والاستياء من النبرة دي ..
محمد صلاح: بعد كام شهر من حكمه قال الرئيس الامريكي انه كان متفائل اكتر من اللازم في حل القضية الفلسطينية ؟
د/منارالشوربجي : الحقثية التصريح دا كان له مشكلتين المشكلة الاولانية كانه مكانش عارف المشكلة التانية انه كان بيتكلم عن الفلسطينيين والاسرائيليين وكانهم متساويين زي بعض مش طرف معتدى عليه انه كان بيتكلم عن الطرفين انه عندهم اسبابهم
محمد صلاح: يعني التصريح دا معنها انه مفيش افق قريب؟
د/منارالشوربجي : التصريح دا جه في وقت كانت شعبيته انخفضت داخل امريكا وانه محتاج يركز على المشكلات في الداخل في السياسة الخارجية لازم كل رئيس يقدم سجل وهو لاوزم يعمل مشروع الرعاية الصحية ودا اخد وقت اكبر مما توقعه
ممحمد صلاح: ليه مااخدتيش المسالة انه كان واقعي شوية ؟
د/منارالشوربجي :صحيح ان هما والاسرائيليين عليهم ان يدركوا ان حل الدولة الواحدة دا دي نهاية دولة اسرائيل لان الاغلبية من الناحية السكانية هيكون للفلسطينيين وبالتالي معناهع نهاية المشروع الصهيوني وبالتالي دا جميل لاسرائيل وبالتالي انا مرة كتبت قلت خلاص هما مش عاوزين الحل دا خلاص هيجي الوقت لغاية ما يبلعوا الارض وتبقى الدولة الواحدة فيها اغلبية عربية وبالتالي لن تكون دولة يهودية زي ماهما عاوزين وبالتالي هتكون موقف لن يتحمله الضمير العالمي في ذلك الوقت
محمد صلاح: موضوع الدولة الواحدة دا فكرني باقتراح اسراطين فاكراه؟
د/منارالشوربجي :اه طبعا
محمد صلاح: طيب خليكي معايا لسه الكلام مخلصش
فاصل
محمد صلاح: هو ايه المنطق اللي العرب قبلوه انه يدخلوا في مفاوضات مع اسرائيل وعادة تفشل فتنهار المفاوضات ليه بيقبلوا فكرة المفاوضات غير المباشرة
د/منارالشوربجي :اصل فكرة انك تتفاوض من اجل التفاوض انك تعمل مفاوضات غير مباشرة عشان توصل للمباشرة عشان بعد كده تبتدي تتكلم عن قضايا الحل وكل دا في الوقت اللي بيحصل فيه التوسع الاستيطاني اللي بيتفاوضوا عليها انت دلوقت بتتفاوض على ارض كل يوم بتصغر وبالتالي انت بتتفاوض على ايه ..!! انا شخصيا اقولك الحل في المجتمع المدني
محمد صلاح: دايما الامريكان بيدوا رشوة للعرب للما يبقوا عاوزين يعملوا أي حاجة هنلاقي الوعد بالدولة الفلسطينية حسب رؤيتك اذا تطورت الاوضاع بالنسبة للملف النووي الايراني وحصلت ضربة امريكية او اسرائيلية او امريكية اسرائيلية لايران هل يمكن ان العرب يقبلوا برشوة مرة اخرى او يشاوروا لهم بالجزرة
د/منارالشوربجي :انا في موضوع ايران الخطورة انه انا كمصرية انا عندي نووي على حدودي يعني مقدرش اتكلم على النووي في أي مكان في العالم اكتر من اللي على حدودي يعني دا اهم له الاولوية الاولى وبالتالي اسرائيل لا تريد هذا يعني احنا بدل ما نتكلم عن اسرائيل بنتكلم عن النووي الايراني اللي لسه ما اتعملش بس احنا نتكلم عن ان احنا هنضرب ايران علشان ايران هتعمل انما اسرائيل عنها نووي قد كده
محمد صلاح: ماشي بس احنا بنتكلم عن الموقف العالمي واسرائيل لسه المجزرة بتاعة اسطول الحرية بتعتبر انها دولة بلا حدود ورد الفعل دايما بيكون ضعيف
د/منار الشوربجي : اصل مين اللي حاطط موضوع النووي الايراني على الاولوية هي اسرائيل وبالتالي هناك نوع من الاختلاف في الموقف بين الامريكان والاسرائيليين الجديد في عهد اوباما هو انه بدا في انه يبقى فيه نبرة مختلفة بتتكلم عن انه المصالح الامريكية ليست بالضرورة متطابقة مع المصالح الاسرائيلية وان اللي بتعمله اسرائيل يعني لما يطلع وزير الدفاع الامريكي يقول انا معنديش أي شك في انه الصراع العربي الاسرائيلي بيؤثر سلبا على المصالح الامريكية ويطلع بايدن يقول لنتنياهو يقول انتوا بتعرضوا حياة الجنود الامريكيين في خطر دي لغة شديدة جدا وفيها واضح الفرق بين المصالح الامريكية من ناحية والاسرائيلية من ناحية
محمد صلاح: في حالة حدثت حرب لايران هل من المتوقع انه الامريكان يقدموا مشروع جديد لتحريك القضية الفلسطينية ؟
د/منارالشوربجي :اسرائيل في الحالة دي مافهاش تحريك ولا لا لان الدنيا هتولع في المنطقة وتركيا داخلة على الخط
محمد صلاح:صعود الدور التركي بيقلق الامريكان؟
د/منارالشوربجي : بيقلق الاسرائيليين جدا المشكلة النهارده قريت تقارير طريفة طالعة من امريكا والله هنعمل ايه 2 من حلفائنا الاقوياء بيتخانقوا لازم نوازن بينهم اللي هما اسرائيل وتركيا في حين ان المسالة مش كده وبالتالي الموقف فيه قلق اسرائيلي من الدور التركي
محمد صلاح: دكتورة منار عندك امل في اوباما؟
د/منارالشوربجي :انا لا اضع امال ابدا على حكومات الحكومات لابد لها من ضغط شعبي حتى تفعل المطلوب منها في حاتلة عدم وجود هذا الضغط الشعبي لا تتوقع شيئا
محمد صلاح: نبقى ياجماعة نستخدم الاوراق اللي في ايدينا محدش يحط امال على شخص بيحكم وقالت خبيرة الشئون الامريكية كلامعا معانا النهارده عن العلاقات المصرية الامريكية عن باراك اوباما بعد سنة من كلمته في جامعة القاهرة وكان كلامها جميل كلام معقول اكيد كان كلام مسئول خلص الكلام سلام نلتقي في الحلقة المقبلة