مي كساب :"أوكا ضحية تعليمه المتواضع "

دافعت الفنانة مي كساب ،عن زوجها"أوكا" ،برسالة جديدة كتبتها ،ونشرتها من خلال حسابها الشخصي بموقع تبادل الصور والفيديوهات "إنستجرام".
وقالت في الرسالة : "كل اللي يعرفني من قريب يعرف كويس أني عمري ما كرهت حد ولا عمري أذيت حد ولا عمري عملت تصرف مخل بالشرف ولا اتنازلت عن شرفي ولا كرامتي في يوم من الأيام، واستحملت ظلم كتير واضطهاد ومحسوبيات، وكنت طول الوقت باصبر نفسي بكلام أبويا الجميل اللي رباني على القناعة، كان دايما يقولي انتي عاملة زي عسكري في الجيش كل شويه بيترقى بجهده وتعبه ويتنقل من سلاح لسلاح، انا مريت بظروف صعبة كتير في حياتي بس للأسف بقالي 4 سنين مش باشوف يومين حلوين على بعض، انا باعيش أقسى أيام حياتي من يوم 1 /12 /2012 يوم ما اكتشفت أن أمي عندها السرطان، وانا مش مي انا واحدة تايهة مش لاقية نفسها موت أمي كسرني، ومن بعدها أحداث كتير قوي وجعتني القريبين مني عارفين".
وأضافت: "انا استحملت حاجات صعبة كتير اد ايه السنين اللي فاتت، بس الصراحة ده أصعب موقف اتحطيت فيه من يوم ما اتولدت مش عشان ده جوزي وحب عمري وإحساسي بعدم وجوده جمبي كان روحي متاخدة من جسمي، لا عشان متأكدة أنه مظلوم متأكدة أنه ضحية طيبته وسذاجته، وللأسف ضحية تعليمه المتواضع الضحل، ضحية ثقته الزيادة عن اللزوم في أي شخص يقرب منه ويضحك عليه ويقوله أنا هاعملك ويوعده وعود كدابة وفي الآخر يستغله ويورطه، طبعا لما باتكلم عن محمد كأني باتكلم عن أحمد كمان أوكا وأورتيجا روح واحدة في جسدين".
وتابعت: "ثقتي في رب العالمين كبيرة جدًا أنه هينصرهم ويفك كربهم ثقتي في عدالة القضاء العسكري كبيرة أنه مش هيظلمهم ثقتي في قلوبكم الرحيمة كبيرة إنكم هتقفوا جمبهم ادعولهم وادعموهم" .