الأقوال المستباحة في النقد والصراحة2

حقول لحضرتك
بس متقلش لحد
«دول» كتير عايزين يساعدونا
بس ان جيت للجد
سمعتنا في العالم لامؤاخذه
صبحت مش ولابد..!!
إلي اللواء أحمد أنيس وزير الإعلام
اللي ربنا يقدره
علي تحقيق الاحلام
ويرفع راية الاعلام قدام
ربنا يكفيه شر المظاهرات
وتغيير الوزارة المفاجئ
في يوم من الأيام..!!
إلي الصحفي الكبير الاستاذ سعيد اسماعيل
عمودك اليومي «علي مزاجي»
علي مزاج كل الناس
يستحق التحية بحماس
وتكسب بيه الدوري والكاس..!!
إلي وزير العدل
اللي يعرف أسماء
اللي بيساعدوا علي
خراب البلد وميعلنش عنهم
يبقوا الناس دول مافيا
والحكومة خايفه منهم..!!
إلي الاعلامي الكبير عمرو الليثي
اللهم اكفيني
شر سواقيني
أما اعدائي واصدقائي
فأنا كفيل بهم..!!
إلي نجم الكوميديا الكبير أحمد آدم
يا برتقان سكري
واستاكوزا وجمبري
وكوميديان مفتري
انت في حاجة لورق مظبوط
ومخرج عبقري..!!
إلي الرئيس المخلوع حسني مبارك
اكيد حتشرف بكره
في المحكمة قاطع النفس..!!
ونايم برضه ع السرير
جوه القفص..!!
يا خوفي يا كابتن يطلعوك براءة
والشعب هو اللي يتحبس..!!
إلي الأستاذ ممدوح رئيس نادي الزمالك
اللي يستثمر امواله
في حب نادي الزمالك
ربنا يبارك له في صحته
وينجيه من المهالك..!!
إلي اللهو الخفي
عمال بتخرب في البلد
شمال ويمين
يا تري انت مين
وبتقبض من مين
الهي ربنا يبتليك برصاصة
متعرفش جيالك منين..!!
إلي الإعلامية الكبيرة ثناء منصور
لازلتي طاقة تنويرية
من الاحترام الاعلامي
ومكانك محجوز
ولا يقبل المنافسة في الصف الامامي
وده كلام كل الناس
مش بس كلامي..!!
إلي الزعيم الخالد جمال عبدالناصر
أحلف لك بالوطن الغالي
وأمي وعمي وعيالي
مصر محتاجة زعيم مثلك
في الوقت الحالي..!!
إلي الاعلامية هويدا فتحي القناة الثانية
اللي مغلوب النهاردة
بكرة لازم يبقي غالب
وميضعش حق وراه مطالب.. «مبروك»
إلي الشعب المصري الغلبان
قيثارتي ملأت بأنات الهوي
لابد للمكبوت من فيضان..!!
«شعر محمد اقبال»
إلي توكل كرمان الناشطة اليمنية
فوزك بجايزة نوبل
يا بنت كرمان
وسام علي صدر المرأة العربية
في كل مكان..!!
لبخيت بن بيومي صاحب المساحة