حجاجوفيتش يكشف مفاجآت حول حقيقة ليبرلاند أحدث دول العالم

علق الرحالة المصري أحمد حجاجوفيتش، على فرحة المصريين بما يسمي بدولة "ليبرلاند" خلال صفحته على موقع التواصل الاجتماعي فيس بوك، مفجرًا مجموعة من المفاجآت حول الدولة الناشئة.

وكتب حجاجوفيتش: المصريين كلهم اليومين اللي فاتوا دول معندهومش سيرة علي الفيسبوك غير ما يسمي بدولة "ليبرلاند" و جالنا عشرات الرسائل الخاصة بتسألنا عنها، فالرحالة المصري حجاجوفيتش قرر زيارتها كأول مصري و عربي يروح هناك، عشان يعرف الحقيقة و الكلام اللي جاي ده مهم جداً جداً لكل الناس المهتمة بالموضوع و الموضوع قد يكون صادم للبعض بس إحنا بنقولهلكم عشان متتجروش ورا آمال زائفة ...

وأردف: أول حاجة لازم كل الناس تعرفها إن الموضوع ده كله عبارة عن وهم كبير قوي و مفيش حد عايش هناك أصلاً، و الشاب "فيت يدليكا" اللي أعلن نفسه رئيس عليها ، كل حكايته إنه طول عمره نفسه يتشهر و إن الناس تتكلم عنه و دخل عالم السياسة و الإعلام و فشل، راح عمل إتفاقية مع شباب صحفيين صحابه عشان يبعتوله الخبر بتاعه ده لأكتر عدد ممكن من وكالات الأنباء و صاحبته عملت عملت ديزاين علم بالألوان و الحاجات اللي هي بتحبها " حمامة و بحر و شمس" ،

واستكمل: المهم الشاب ده راح مكان فيه غابات و شجر بين كرواتيا و صربيا "مساحتها كلها علي بعضها "7 كم مربع" يعني مصر الجديدة عندنا أكبر منها بحوالي 20 مرة... و قال الأرض دي فاضية مافيهاش حد فحعتبرها بتاعتي أنا و صاحبتي و أصحابي و هو أصلاً من جمهورية التشيك يعني ولا كرواتي و لا صربي!!يعني بالضبط كإن واحد أجنبي جه مصر و راح واقف في الصحرا علي طريق القاهرة - السخنة و راح عامل خيمة و قالك مفيش حد عايش هنا ، الأرض ده بتاعتي و بدعوا العالم كله يجي بلدي الجديدة و يسميها "ليبرلاند" أو "أرض الحرية" بالعربي ‎smile‎‏ رمز تعبيري

و بعدين أوهم الناس كلها إن كمان مفيش عملة و فلوس، و إنهم يستخدموا البيت كوينز "عملة إلكترونية علي الإنترنت بس" عشان تكون عملتهم الرسمية و البيت كوين الواحد ثمنه حوالي 400 دولار أمريكي يعني حوالي 3000 جنيه مصري، والأخطر من ده كله إن كل المعلومات الشخصية بتاعة اللي بيقدم علي الموضوع ده كلها متجسس عليها و بتوصل لحكومات و سفارات الدول الكبري عشان يعرفوا منها مين اللي عايز يسافر من بلده و مايرجعش و بالتالي لو راح بعد كده يقدم علي فيزا سفر في أي سفارة بتاعة بلد كبيرة حيتم "رفضه" بعد ما يدفع تمن التأشيرة و يسلم أوراقه ، عشان يبقي خسر كل حاجة.
واختتم: طيب السؤال دلوقتي للي عايز يهاجر و يسيب بلده عشان كل واحد يفكر فيه كويس أوي أوي ، لو عايز تهاجر و شايف مصر بلد وحشة و مش لايقة مع عقليتك، هو لو أخدنا حتة أرض في حجم مساحة مصر كلها "مش بس مصر الجديدة أو مدينة نصر" في حتة تانية في العالم و نقلنا ليها سكان مصر بنفس عادتهم و تقاليدهم و أسسنا دولة جديدة بإسم جديد و علم جديد ... تفتكروا حتكون عاملة إزاي ؟ أكيد و منغير أي تفكير طبعاً حتكون نسخة من نفس الي عايشين فيه دلوقتي من غير أي تغيير ..."إن الله لا يغير ما بقوم حتي يغيروا ما بأنفسهم"