مبارك: لست خائنا.. وسلمت مصر للجيش لأنه بيتعمله ألف حساب

أكد الرئيس المخلوع حسني مبارك أنه ظل لأكثر من 30 سنة رئيسًا لمصر لم يخن فيها قسمه ولا عهده بالحفظ عليها، لافتا إلى أنه بشر يصيب ويخطئ لأنه يعمل سياسيًا وهذا وارد في علم السياسة.
وقال مبارك في حوار زعمت صحيفة الوطن أنه أول حوار رسمي للرئيس المخلوع: "مش زعلان على إنهم بيحتفلوا بنصر أكتوبر وأنا مش فيه.. أنا أديت واجبى.. يقولوا اللى همه عايزينه.. بس زعلت كتير لما «مرسى» احتفل بنصر أكتوبر فى وجود قتلة الرئيس العظيم الراحل أنور السادات.. بس الحمد لله إن الشعب المصرى يقف دائماً مواقف البطولة فى المراحل الصعبة".
وكشف مبارك فى حواره عن تفاصيل كثيرة منها علاقته بالسادات ومسألة التوريث، مؤكدًا أنه لم يُدلِ من قبل بأى تصريحات صحفية منذ تنحيه عن الحكم، وأن كل ما نشر على لسانه، بما فى ذلك ما انفردت به «الوطن» كأول صحيفة تنشر -آنذاك- تسجيلات صوتية لمبارك، لا يعدو أن يكون تسريبات له فى أحاديثه مع أشخاص أو أطباء يشرفون على علاجه.
وأوضح «مبارك» أن إحدى الصحف نشرت له تسجيلاً صوتياً لعدة دقائق قبل أشهر لم يُدلِ به، مفجراً مفاجأة بقوله «علمت أن هذا التسجيل كان دعابة فكاهية من أحد الأشخاص الذين يبرعون فى تقليد صوتى، وأنه أوهم صحفياً شاباً بأن المكالمة الهاتفية معى شخصياً.. وأجاب عن أسئلة الصحفى بصوت شديد الشبه بصوتى، وحين نُشرت هذه العبارات الوهمية لم أرغب فى مقاضاة الصحفى والجريدة لأننى قررت التسامح مع كل من أخطأ فى حقى، كما أننى لا أقبل أن يحاكم صحفى شاب خدعه أحد الأشخاص بتقليد صوتى، بسبب غضبى من الموقف نفسه، وقررت بعد التشاور مع أسرتى وبعض المقربين منى التزام الصمت تماماً، وقلت لنفسى «هىّ جت على الحكاية دى.. ما أنا اتظلمت فى حاجات كتير، وبلاش أدمر مستقبل شاب خدعه واحد ظريف بيقلدنى»..!
ولكن هناك أخطاء كثيرة يرى البعض أنك مارستها أثناء فترة حكمك؟
والله أنا بشر أصيب وأخطئ، وفى السياسة هذا وارد فى العالم كله.. أنا كنت رئيساً ثلاثين سنة، وطبيعى أن أفعل أشياء جيدة، وأخرى يراها البعض خطأ، ولكن لازم نعرف أن فيه حاجات ومعلومات وملفات كثيرة لا يعلمها إلا رئيس الجمهورية بحكم موقعه، وحين يتخذ القرار المناسب من وجهة نظره فى أمر ما، وبناءً على المعلومات المعقدة التى لديه، ينتقده الكثيرون، لأنهم لا يعرفون التفاصيل والمعلومات التى تحكم هذا القرار، بس فى الآخر أكيد أخطأت فى أمور ما.. ومين فينا مش بيغلط.. بس أنا ربنا يعلم أننى لم أخُن بلدى فى أى لحظة.. حاربت من أجلها، وضحيت بحياتى الشخصية والأسرية، وأكيد فيه ناس شايفة إنى كان لازم أعمل أحسن من كده، ماشى، بس ده اجتهاد.. بس قتل ماقتلتش!
? بمناسبة الحديث عن الحرب، ونحن نحتفل بذكرى انتصارات أكتوبر، ماذا تبقى فى ذهنك وذاكرتك عن هذه المعركة؟
- شوف.. أنا راجل عسكرى طول عمرى، تعلمت فى القوات المسلحة إن الجيش المصرى جيش نظامى، من أقدم وأقوى جيوش العالم، والله انتم ما عارفين قيمة وعظمة الجيش المصرى، والمشكلة أن أعداءنا همه اللى عارفين أد إيه الجيش ده قوى، ويعملون له ألف حساب, مش بالسلاح ولا عدد المقاتلين، لكن الأهم إن كل ضابط وجندى يحمل نفس الإيمان بالله والوطن والشعب، علشان كده أنا لما تخليت عن الحكم، قلت أسلم الأمور للمجلس العسكرى لأنه مش بس عنده كفاءة لإدارة البلد، ولكن لأنه يعرف حجم التضحيات التى بُذلت لحماية الأرض والوطن، وعارف كمان إن عندنا أعداء وخصوم، والحمد لله إن الجيش المصرى هو الوحيد الثابت والمتماسك والقوى فى المنطقة كلها، ولسه بيضحى علشان بلده.
صمت «مبارك» لحظات.. وأضاف: حرب أكتوبر أعظم ملحمة خاضها الشعب والجيش.. وانتم بتسألوا نفسكم ساعات: هو ليه «مبارك» مش خايف من الموت أو السجن أو غيره؟!.. الإجابة بكل بساطة إن «مبارك» زى كل الجيش شاف الموت مئات المرات، هوه أنا لما كنت باطلع فى الجو بطائرة من القاذفات الثقيلة محملة بقنابل تدمر مدينة، كنت عايش ولاّ ميت.. إحنا شفنا زملاءنا بيموتوا وهم مبتسمون، والله هذا حدث.. وكأن الواحد منهم فرحان إنه بيموت علشان بلده.
? كيف خاضت مصر هذه الحرب وهى فى أصعب الظروف؟
- تخيل إن الجيش المصرى وقتها كان يعمل بأضعف الإمكانيات والأسلحة مقارنة بالعدو.. بس الإيمان والبطولة كانت لصالحنا، وما زلت أتذكر الرئيس البطل الراحل أنور السادات وهو يخطط معنا للحرب، كان واثقاً من النصر، ومع ذلك كنا نخطط ونعد لكل كبيرة وصغيرة، وأتذكر أن السادات استدعانى قبل الحرب بفترة طويلة حين كنت قائداً للقوات الجوية، وقال لى «اسمع يا حسنى.. أنا عايزك تشتغل جامد.. شوف إحنا حاربنا سنة 56 بدون طيران حربى، وحاربنا فى 67 بدون طيران، وفى الحرب اللى جايه لازم يكون عندنا طيران، وإلا موقفنا هيكون من أصعب ما يمكن، طبعاً تحملنا عبئاً كبيراً، وكنا بنشتغل ليل نهار، حتى وصلنا إلى سلاح طيران قوى خاض الحرب ببطولة.
وظل «السادات» يتابع معنا تفاصيل الاستعداد للحرب، واستدعانى للجلوس معه يوم 20 سبتمبر 1973، وكان مستغرقاً فى تفاصيل الحرب المقبلة، وقال لى «انت جاهز للحرب»؟!.. فأجبت «جاهزين يا ريس».. فقال «السادات»: اسمع يا حسنى لو القوات الجوية مش جاهزة أنا هقرر تأجيل الحرب..! فأجبته: جاهزين.. فقال مرة أخرى: لو مش جاهز يا حسنى هأجّل الحرب، أنا ما أقدرش أدخل الحرب من غير طيران قوى.. فقلت له: إن شاء الله إحنا ماشيين كويس
? هل كان «السادات» لديه مخاوف من عدم جاهزية الجيش والطيران وخلافه؟
- لأ.. هو كان واثق فى قدرة الجيش على الانتصار.. بس دى طبيعة القائد العسكرى.. كلنا كنا زى «السادات»، عايزين نخوض الحرب بأعلى درجات الاستعداد.. وأتذكر أن السادات قال لى فى نفس الجلسة يوم 20 سبتمبر 1973، أى قبل الحرب بأيام قليلة: فى 56 و67 ما كانش فيه قوات جوية بتشتغل، ولو الحرب اللى جاية خسرناها أو القوات الجوية ما انتصرتش هيعلّقوا لنا «المشانق».
? معنى ذلك أن السادات وقادة الجيش كانت تنتظرهم «المشانق» لو لم ننتصر فى حرب أكتوبر؟
- طبعاً.. وكنا كلنا بنقول لبعض ده.. مش بس كده، دى كانت البلد هتتبهدل.. يعنى ما كانش هيقوم لمصر قومة، لذلك كل القوات المسلحة كانت بتشتغل جامد جداً.. قوات جوية وبحرية وبرية.
? ما رأيك فى المشير أحمد إسماعيل وزير الحربية فى حرب أكتوبر؟
- أحمد إسماعيل.. ده راجل «عُقر».. لا أنساه إطلاقاً.. كان قائداً عسكرياً فذاً ومخلصاً، وخلينى أقول لك إن كل القادة العسكريين كانوا عظماء: السادات، المشير أحمد إسماعيل، سعد الشاذلى.
? كيف كان الأمر فى الخلاف بين السادات والفريق سعد الشاذلى وقتها؟
- كان الرئيس السادات وقتها «غضبان من الشاذلى».. أنا كان ماليش دعوة بيه.. لم أكن غاضباً منه.. والشاذلى رجل محترم.. بس هوه لما زعل مع السادات «شتم شوية» وهو بره.. وأتذكر أيضاً القائد محمد على فهمى، والجمسى.
? هل تغضب حين يتم الاحتفال بذكرى انتصارات حرب أكتوبر وتجاهلك؟
- أنا مش بزعل خالص.. أنا أديت واجبى.. يقولوا اللى همه عايزينه.. بس زعلت كتير لما «مرسى» احتفل بنصر أكتوبر فى وجود قتلة الرئيس العظيم الراحل أنور السادات.. بس الحمد لله إن الشعب المصرى يقف دائماً مواقف البطولة فى المراحل الصعبة.
? بصراحة.. هل كانت مسألة «توريث الحكم» لنجلك جمال حقيقية؟
- والله العظيم ما كان فيه حاجة من دى خالص.. إزاى حد يفكر إنى كنت ناوى أورّث الرئاسة لابنى.. ده أنا كنت ناوى ما أرشحش نفسى للرئاسة بعد كده.. كنت تعبت خلاص وعايز أرتاح.. ثم إن «جمال» ابنى كان له دور محدد فى الحزب الوطنى.. يعنى لا رئاسة ولا دياوله.. وأنا نفيت الكلام ده كتير.. وما حدش صدّق.. وكمان هى مصر «عزبة» علشان أورّثها لابنى؟!.. ومين كان هيقبل التخريف ده.. أنا نفسى ما أقبلش.. وقلت ده أكتر من مرة لكل القيادات فى الدولة، ومنهم اللواء عمر سليمان يرحمه الله، والمشير طنطاوى، وصفوت الشريف.. كنت أضحك عندما تأتينى تقارير عن الكلام حول «التوريث» وأقول لهم انتم تعرفوننى جيداً.. أنا راجل عسكرى وجدّ.. مش بتاع لف ولا دوران.. إزاى أفكر إنى أحط ابنى فى مشكلة كبيرة.. وإزاى أختم حياتى ومشوارى الطويل فى خدمة البلد بمصيبة وكارثة.. أيوه كارثة إنى أكون رئيس جمهورية فى دولة كبيرة، وأعملها «ملكية» بالتوريث.. طيب التاريخ هيقول عنى إيه بعد كده.. والشعب المصرى إزاى هيقبل ده.. وأنا قلت كتير إن مصر مش سوريا.. وإن ده مستحيل يحصل.