فتاة: "خايفة أروح المدرسة بسبب التحرش"

واصلت اليوم الأحد، مبادرة خريطة التحرش الجنسى، نشر قصة لفتاة تعانى من تحرش زملائها في المدرسة، وذلك ضمن حملة "مش ساكتة" التي أطلقتها المبادرة؛ للقضاء على هذه الظاهرة المنتشرة في المجتمع المصرى.
نص الشهادة:
يمكن تكون حاجة تصدمكم بس انا اللى كان بيتحرشوا بيا زمايلي في مدرسة م المفروض انها محترمة وخاصة !! اللى حصل أن المدرس طلب مني احضر حصة مع طلاب 3 ثانوي ولاد لوحدي عشان انا متأخرة.. وافقت لأنه عادي إيه اللى فيها، مستحيل كان ييجي في بالي أنه هيحصلي حاجة !!
المهم فعلا حضرتها لقيتهم بدءوا يهزروا بالكلام ماردتش الموضوع اتطور وواحد فيهم حاول يشد الطرحة من على شعري لما لقيتهم بيتلموا عليا طلعت أجري على الباب عشان المدرس مكانش لسه جه ! سكت طبعا لأني مش عايزة سمعتي تتمس بكلمة !
بعدها فيه واحد من الولاد دول وانا طالعة على السلم مرة قرر يشدني من الشنطة خد السلم كله وقوع اتكرر أكثر من مرة وماكانش بيبقى فيه حد !!
ولحد يومي ده ماحاكتش لحد غير أختي بعد ما عدى على معاناتي في المدرسة دي أكثر من سنة !!.. أختي هاجمتني جامد اني ازاي سكت وازاي ماعرفتش اخواتي الولاد عشان يأخدوا موقف معاهم.. ماتكلمتش لأني عارفة أن انا اللى غلطانة وازاي أوافق أقعد مع ولاد لوحدي واكيد انتي اللى كنتي موافقة.. هتتكلمي عايزة سمعتك تبقى على كل لسان في المدرسة في الشارع اللى انتي ساكنة فيه الناس هتقول عليكي مش محترمة !!
ونقلت منها هروبا من القرف اللى كنت فيه !
هو طبيعي اني اخاف أروح مدرستي !؟ طبيعي أبقى في مدرسة نظيفة ومحترمة ويحصلي كده !
أنا واخدة وعد اني مش هسكت ومش هخاف.