ماهر: ما يحدث فى محمد محمود "عبث ومعارك فارغة " من الثوار

أدان أحمد ماهر، مؤسس حركة شباب 6 إبريل والمنسق العام لها، ما يحدث من اشتباكات فى محيط شارع محمد محمود والتى امتدت حتى فجر اليوم الثلاثاء، واصفًا ما يحدث بأنه "عبث وعنف بدون أى داعى"، مؤكدًا أن هناك قضايا أهم يجب أن ينشغل بها الجميع مثل الدستور.
وقال ماهر : إن أحداث محمد محمود الأولى كانت بسبب التعدى على أهالى الشهداء، وأحداث مجلس الوزراء كانت بسبب التعدى على الاعتصام، متسائلًا عن أسباب ما يحدث حاليًا "طيب اللى بيحصل النهارده ليه؟".
وتابع مؤسس حركة 6 إبريل "طيب اللى بيقول إن غير كافى المسيرات والاحتجاجات ولازم نولع فى الداخلية علشان نجيب حق الشهداء، بذمتك دا عدد واستعداد ينفع؟ ودا حل أصلا؟، مش بسأل عن المشاركة فى اليوم والمسيرات لأنى شاركت فيها، بسأل عن البدء بالطوب والمولوتوف".
أضاف ماهر مستنكرًا مايحدث "الداخلية طول عمرها بلطجية، لكن أنا طول عمرى ضد بدء العنف أو أننا نركب نفسنا غلط آخر".
وانتقد ماهر من يوجهون له الانتقادات بسبب تقييمه لما يحدث، مضيفًا "مش مضطر أدافع عن عبث علشان يبطلوا مزايدات ويتقال عليّ "ثورى"، اللى حصل واللى بيحصل عبث وعنف بدون أى داعى، واللى عايز يزايد يزايد".
وأكد عضو الجمعية التأسيسية المنسحب أن الشعب يتعاطف مع الداخلية ويجب على الثوار عدم استنفاد جهودهم فى معارك وصفها ب"فارغة"، مضيفًا "الشعب اللى بيتفرج ومتعاطف مع الداخلية ده هو اللى بيصوت فى الانتخابات واستفتاء الدستور، واللى عايز يفوز مايهدرش مجهوده فى معارك فارغة".
واختتم ماهر تصريحاته متسائلًا "تفتكروا الناس اللى بتتفرج على الاشتباكات على الهوا دلوقت وشايفه المولوتوف، هاتصوت لمين فى الاستفتاء وتنتخب مين فى مجلس الشعب؟".