فلان: انت مش ملاحظ حاجة! علان: ان جيت للجد.. الملاحظات كترت والواحد بقي يلزمه دستة عيون. فلان: يا سيدي بلاش فذلكة.. أنا عايز أكلمك عن اكتساح التيار الاسلامي. علان: تاني!! فلان: طول بالك.. أنا عايز أسألك عن اللي بيتكلموا عن الخمرة والسياحة والبوس في الأفلام ووجبة الفراخ اللي لازم يغطوا فيه الصدر والورك. علان: وللأسف ما حدش ناقش أفكارهم الاقتصادية والسياسية والقانونية. فلان: عايز تفهمني ان عندهم برنامج. علان: وفيهم علماء ودكاترة وخبراء علي أعلي مستوي. فلان: يعني الاقتصاد ممكن يتحسن.. والبلد تتقدم علي أيديهم. علان: هما مش لوحدهم في الميدان.. وبعدين زمن الركوب الفرداني والأبدي في السلطة انتهي.. وكل شيء دلوقت علي السكين. فلان: طمنت قلبي.. كده بقي أروح أرجع الجلابية والدقن والزبيبة.. اللي كنت شاريهم لزوم المرحلة الجديدة. علان: عين العقل واشتري بدل منهم.. فأس عشان تزرع وشاكوش عشان تصنع ومخ عشان تفكر وضمير عشان تشتغل. ابن البلد