بالتحديد - والله لسه بدري والله

* يا سبحان الله الأيام الحلوة.. تمر بسرعة البرق.. والأيام المبروكة تمضي.. والحمد لله أن مر رمضان المبارك واللهم اجعل أيام العيد أيام خير وحب.. واللهم اسبغ علينا فضلك ورضوانك واحفظ مصرنا الغالية وامتنا العربية والإسلامية ومع أيام عيد الفطر المبارك يارب تعود أيامنا كلها اعيادا وكل عام وأنتم بخير.
* إيه الحكاية يا عمرو زكي.. رغم أن حقك.. لكن العب يا راجل.. اعمل حاجة.. ارجع مرة ثانية بصراحة أنا مش شايف عمرو بتاع زمان من غير زعل.. كل اللاعبين الكبار.. للاسف بيقضوا مدة تعاقدهم بالملايين إما مصابين.. إما زعلانين.. إما بيلعبوا علي النادي.. والخسران الوحيد الجمهور.. والنادي وسلم لي علي الاحتراف المحلي.. المهم عند اللاعب الملايين وليس اللعب مش كده ولا إيه.. لو فيه غير كده قولولي.
* يا عيني علي الارسنال.. قبل 8 أهداف من مانشستر يا اه.. أنا لا اصدق معقول ومع ذلك ارسيه فنجر لم يستقل عارفين ليه.. لانه مدرب كبير.. وفي الدوري الانجليزي مش دوري مش عارفين أوله من آخره.
* شوفوا كريستانو رونالدو هاتريك الريال.. النادي الملكي في بداية مشوار الدوري الاسباني وقولولي.. يستاهل كام.. تفتكروا لو طلب ملايين الريال.. كتير عليه.. قولوا لنجومنا اتعلموا بقي.
* يا تري الإسماعيلي رايح فين ارحموا الجمهور.. والحقوا الفريق قبل الدوري بصراحة.. ربنا يستر علي الدراويش في الموسم الجديد.
* الأهلي وإنبي يرفضان دوري المجموعات وبصراحة اقتراح المجموعات ده غريب جدا يعني إيه 5 مجموعات ياجماعة انا تعبت من اقتراح تصعيد المنصورة والترسانة وأسوان وفريقين من افضل توالت ويقام الدوري علي مجموعتين كل واحدة 12 فريقا ده مش لغز.. بصراحة 19 فريقا غير مقبول. 36 أسبوعاً وراحة اجبارية لفريق كل اسبوع إيه العك ده.
* بصراحة ما حدث من جماهير المنصورة لا يقبله احد اعترض آه.. دعاوي قضائية آه.. غضب آه.. اعتصام آه.. مظاهرة آه.. نداءات.. لكن اقتحام لا.. اتمني تحكيم العقل.. مش بالطريقة دي ح ترجع المنصورة للممتاز.. وبعدين بصراحة لوموا فريقكم الذي فرط في الفرصة للصعود ونفس الكلمة دي تنطبق علي الترسانة وأسوان لماذا لم يفز احد منهم وحصل علي حقه بعرقه ولا هية الحكاية أماني بالعافية.
* حسني عبدربه.. أنا احترت معاك.. أنت عاوز الزمالك.. ولا الهلال.. ولا الإسماعيلي ياكابتن النجم من يتمسك بناديه ليس من أجل الملايين.. لكن للاسف الحوار ده لا يناسب هذا الزمان.. وعلي رأي الراحل عبدالمطلب عمر اللي فات ما ح يرجع تاني.
* يا حلاوتك يا منتخب الاسكواش بصراحة هو احلي حاجة في جبين الرياضة المصرية بطل العالم للمرة الثالثة في تاريخه مبروك لرامي عاشور وكريم درويش هزموا الانجليز فين في ألمانيا.
* مبروك مقدما لجميل حنا رئاسة اتحاد رفع الاثقال.. وعقبال انتخابات المصارعة.
* دوري رابطة الابطال الافريقي.. احلو.. وولع وكل عام وأنتم بخير.