رباعيات للشمس شعر: حسام العقدة

وفي بحر عينيكي.. غرقت في دمعي
وانا ضد رياحك فارد قلعي
لو اكون آدم.. ووحيد في الكون
ازاي اسيبك تخرجي من ضلعي؟
***
علشان تفاصيلك.. اكون نحّات
واصحي بأزميلي عليكي.. وابات
واعمل تمثال.. ما بيشبهكيش
وان شاله افضل انحت سنوات
***
لو ممكن.. أرقص ويّا الشمس
واتدفي بنظراتها.. وبالهمس
لكن خايف تحرق إيدي
لو اجرّب مرّه معاها اللمس
***
بصّيت علي وشّي ف صُبح جديد
فلاقيته محتاج قوي.. يبقي سعيد
محتاج لك.. قبل ما ييجي بكره
قبل ما تظهر فجأه التجاعيد
***
حلمي الموال.. وسحابة صيف
والعشق جبال.. وانا زي ¢سيزيف¢
طالع وشايل لك قلب دهب
ولا جِبت معايا دروع.. ولا سيف!
***
ولا نغمه عليّه بتصعب
هاتي عودك.. وسيبيني العب
المزيكا حياتي
ومعاكي.. ما اظنش هاتعب
***
طفله بتستهتر بالعصافير
وانا بين صوابعها.. وعينها اسير
ولا عارفه إن ده بيسمّوه عذاب
ولا عارف أهرب منها.. واطير
***
عشقِك خلّاني مدين
في علاقه بين عبد.. ودين
وبقالي سنين.. رحّال
نظرة عينك فدادين!
***
احزن.. واغني.. واهرّج
وانت عليّه بتتفرّج
انا حد.. باحب بجد
مش اراجوز.. ولّا مهرّج!
***
يتحكّم ليه ¢كيوبيد¢ ع القلب
شاف إيه افراح.. أو شاف ايه غُلب
يقدر يكتب اشعار زيي؟!
انا.. ممكن ابقي إله الحب
***
شمسك في الليل بتطل
وتزوّق عمري.. بفل
وانا عايش مدّاح ليها
مش ممكن اعيش في الضل
***
هادي.. وحاسس إن انا راضي
كل اللي ف قلبي.. بقي قصادي
اشعار في الحب.. وفي الحرمان
ورجعت خلاص إنسان.. عادي