حبيبي ظروفه على أدّه وخايف يظلمني معاه

السلام عليكم.. إزيكم يا أحلى موقع، أنا بجد بحبكم أوي لأنكم بتحلوا لي كل مشاكلي، أنا حاليا عندي مشكلة كبيرة أوي.
أنا عندي 22 سنة، اتخرجت خلاص الحمد لله وباشتغل، المشكلة إني بحب واحد وهو كمان بيحبني، بس الظروف مش سامحة إننا نتخطب دلوقتي، لأنه لسه بيدور على شغل علشان كل ما يشتغل بتحصل ظروف خارجة عن إرادته ويسيب الشغل..
المهم هو عرّفني على أهله وأهلي عارفين إنه مابيشتغلش، بس علشان عارفين إني بحبه وافقوا إنه ييجي، ولما ربنا يسهل نتجوز، لأن ده حال كل الشباب في البلد، المهم إنه فاتح أهله وطبعا رفضوا علشان مابيشتغلش، وقالوا له إنت فاكرها سهلة الخطوبة؟ مسئولية طبعا زي الجواز..
وأنا مش بالوم عليهم، أنا عارفة إن معاهم حق، وحتى لما عرفوا إن أهلي موافقين برضه رفضوا، عشان بيقولوا مش عاوزين إحراج إلا لو كان بيشتغل، لأن كلامهم إن أهلي أو أنا لو صبرت سنة مش هاصبر التانية، وهو دلوقتي مش عايز يكلمني ومش بيرد عليّ، حتى لما قلت له صدقني أنا هاستناك وراضية أقف جنبك قال لي إنه خايف يظلمني.
مع العلم هو أكبر مني بسنة وخايف إني أتعلق بأمل وأرجع أتصدم، وده لأني أنا من النوع اللي بيتأثر أوي يعني، ممكن أدخل المستشفى لو حاجة وحشة حصلت، المهم هو حاليا رجع يكلمني، وده طبعا بعد عذاب إني أتصل بيه ولما رد عليّ أقنعته إني كده كده سواء هو بعيد أو قريب هاستناه لأني بجد بحبه أوي.
أنا مش عارفة بقى، هو حاليا يوم يكلمني ويرد عليّ وعادي يتصل بيّ، وتاني يوم مايكلمنيش أو يقطع فجأة ومايردش، أنا تعبت مش لأني مستنياه، لأ لأنه مش سامح لي أقف جنبه وأكون معاه، لدرجة إني بقيت خايفة إنه يبعد وينساني.
أنا بجد مش عارفة أعيش من غيره، هو بالنسبة لي كل حاجة، قولوا لي الحل إيه، أقنعه إزاي إنه ماينفعش يكلمني يوم وفجأة يبعد؟ أعمل إيه؟ ساعدوني بحل كويس بس أرجوكم ماتقولوش ابعدي وسيبيه، لأني عمري ما هاتخلى عنه وأنا عارفة إنه محتاج لي زي ما أنا محتاجة له.

Hidy


صديقتنا العزيزة.. حبيبك في فترة حرجة وعليه ضغوط كتيرة وإنتي بتزوديها بحجة إنك واقفة جنبه، تعالي نشوف الموضوع من الأول، إنتي فعلا عملتي اللي عليكي ووصلتي له كل الرسايل، عندك استعداد تستني وتصبري وتستحملي وأهلك كمان موافقين وراضيين، والمشكلة عنده هو، هو مش لاقي شغل ثابت ومش قادر يقنع أهله بتحمله لمسئولية الارتباط بيكي.
بس الكورة في ملعبه، إنتي خلاص عملتي اللي عليكي من كل ناحية، هو بقى محتاج يهدا ويركز ويخطط لمستقبله اللي هو مستقبلك إن شاء الله، محتاج يحس إنه حر فيتحرك براحته ويدوّر على شغل براحته، ويمكن ربنا بيحبه إن حصلت التعقيدات دي في موضوع الخطوبة، عشان مايبقاش ماشي في الحياة وعلى كتافه حمل ضخم ومسئولية يمكن يكون مش أدّها في الوقت الحالي.
هو قال لك إنه مش عاوز يظلمك معاه، ومش عاوز كمان يشيل ذنبك لو ماقدرش ينجح في مساعيه، بس هو ممكن ينجح لو إنتي بدّلتي مشاعرك اللي كلها قلق وإلحاح وأسئلة وزنّ ومتابعة من ناحيتك، لحب وثقة وبدأتي تكلميه من فترة للثانية تسأليه بودّ عن الأخبار، لقى شغل ولا لأ؟ وتبيّني إنك واثقة فيه وتقولي له إنك واثقة إن ربنا هيقف جنبه ويساعده وهيحقق كل أحلامه، بالطريقة دي هو حتى لو بِعِد مش هينساكي، بالعكس هيحترمك وهيفتكر إنك دايما كنتي واقفة جنبه وبتدعي، وماكنتيش ضغط عليه وحمل على أكتافه.
هو عمره ما هيفكر في واحدة تانية، لأنه بالفعل مش جاهز ماديا ولا معنويا، جايز يفكر في السفر، وده هيخليه أكتر عاوز يبعد عنك، عشان هو مش عاوز يسافر ويسيبك ويفضل قلقان، ماتبقيش زي الدبة اللي قتلت صاحبها بحجة إنها بتحبه.
حاولي تتحكمي في نفسك وتقللي مكالماتك له، وتغيري من لهجتك معاه ومن طريقتك في الحب، وبدل التتبع وحالة الحصار خليكي واثقة فيه وفي اختيار ربنا ليكي وإنه لو نصيبك إن شاء الله هتكونوا لبعض، وشجعيه يتحرك بحرية ويحاول يبني نفسه، وصدقيني حتى لو خسرتيه كحبيب بسبب الظروف، هيفضل صديق وهيفضل يحترم وقوفك جنبه واحترامك له في قوته وضعفه، وربنا يوفقك.

لو عايز تفضفض لنا دوس هنا