مظبوط مقامك ع الصبا... يا ناي يتيم غرقان في دمعك م الفراق... والهم غيم مين اللي طبطب أو مسح... من قلبك الجرح القديم؟ مين اللي دق الباب عليك فاوقفت زي الضل خايف والحزن صايبك في الصميم؟ يا بحر ثاير ع الشطوط تصرخ وخايف م الغرق تصرخ بعلو الصوت تقول:... أنا أول الأيتام هنا مولود في هذا الكون يتيم وكأني "آدم" والسما أمي.. اللي فارقت من سنين وكأني في الأرض الطريق راحل ومش عارف لفين وكأني في الوحده القمر بيحاكي فوق النهر وشه وكأني طير ومن الوجع... بيهد عشه وكأني نور مكسور حزين والهم بيت بشويش... باخشه أصرخ بحرقه وأنتفض... من أي صوت أرقص... وضلي من الوجع عصفور... بيرقص ع الجدار أهرب لضي يضلني فراش وضي... الوحدة.. نار مركب وعشمان في الوصول وشراعي بتهده الرياح "يمني قلبي بالأفراح وأرجع وقلبي كله جراح" يا ليل يتيم ازاي تقيم الطبل وانت بتنكسر؟ إزاي هتفرح أو تحس بطبطبة؟ وانت اللي مربوط ع الصبا انظر لوشك في الصور الحزن باين يا صديق رغم ابتسامك رغم امتثالك للفرح الدمع خانك يا تخوض حروبك بالوجع يا تموت كأنك نخل ثابت... في مكانك