وصية شهيد

بصراحة مافيش كلام يوصف أنا ايه مشاعري
والله أنا م المفاجأة اتقيد مني شِعري
اتكسر حتى قلمي اتهد ف لحظة حلمي
ازاي بتقولو منكو وازاي رخصتو سعري
ازاي أنا ابقى منكو ويهون عليكو دمي
لو ناسيين اني مصري ازاي نسيتو أمي
ازاي شيفاني نازل راسم فرحة بعنيا
وازاي تقدر تشوفني راجع غرقان ف دمي
افتكروا دموع عنيها الل هتنزل عليا
والحزن الل ماليها على لحظة غدر بيا
والله خايف عليها من صدمتها عليا
لما هتشوفني راقد جثة وملفوف ف علمي
********
قلتلها يا أمي نازل رايح على بورسعيد
رايح أشجع يامّا وراجع .. مع أصحابي الايد ف الايد
قالت يابني بلاش وحياتي .. خايفة عليك لتروح متجيش
وأنا لو ضعت ياضي عيوني .. من بعدك مش هعرف أعيش
قلتلها ادعيلي انتي يا أمي .. وأنا هرجع مبسوط وسعيد
قالت روح والقلب داعيلك .. ويكون ظني يارب بعيد
بتودعني ودمعه ف عينها .. وكان احساسها ساعتها غريب
بس دا قلب الأم ويمكن .. حاسة بان معادي قريب
كان احساسها ياناس ف محله .. بعد الماتش حاوطنا الموت
ناس بتموت من كتر الضرب .. والل خدوه دبحوه ف سكوت
والل اترمى من رابع دور ... والل اتكوموا عليه بالدور
والل رموه مجروح وبينزف ... والل سبوه بيموت مكسور
نزلت أمي تنادي عليا .. قالت سابني وراح لبعيد
والل بيسأل راح على فين ؟ تقول لقضاه ف بورسعيد
والل يقولها بكره هيرجع بس دا بكره عليها بعيد
والل يقولها ربي يعوض .. واعتبريه يا أمي شهيد
********
استنى هوصيك وصية ياللي انتا غدرت بيا
وهحملك أمانة قبل ما أغمض عنيا
بلغ أمي سلامي وطمنها عليا عرفها بأني رايح لمكان هتحبه ليا
مش عايز بعد ما أمشي تنزل دموع عنيها
وحياة ابنك يا أمي حوشي دموعك عليا
وبلاش الحزن يامّا دا نصيبي وراضي بيه
الل مزعلني يامّا أبويا ذنبه ايه .. كان نفسه يشوفني حاجة
ويوم يتباها بيا .. معلش يابويا قدري أرجوك حقك عليا
ومتنسيش يامّا أخويا وخليه يبقى يزورني
وان شجع مرة كورة على طول هيفتكرني
وبلاش وحياتي ياما تدعي ع اللي قتلني
دول مهما كانو يامَا ناسي وحته مني