عزيزة .. وملامحك في ملامح أهلي حنّي عليّا.. إلتفتي يوم... طلّي وبلاش عزيزة.. تكشرّي في وشّي دا أنا بخاف عليكي م الدمع.. تتبلّي بلاش أشوف قسوتك.. يا حلم عمري بلاش أبقى في حضنك مغلوب على أمري و بلاش عزيزة.. بسهوله تتخدعي و تتغشّي بلاش تكوني انتي سبب كسرتي و قهري مالك بقيتي بعيده.. وبيني و بينك أمد؟؟ وإزاي ناس من ولادك.. شربوا دم الولد؟؟ لأ..دول مش ولادك.. إتبرّي منهم.. وفي وشّهم كشّي ما تسكتيش على دمه.. عزيزة.. دا انتي البلد إنتي البلد بعدك.. ماليش غيرك إغضبي و ثوريي واعتقي أسيرك الولد مات عشانك.. ما تغمضّيش عينك وتغشي عزيزة إنتي الجناح.. وياما اشتكى طيرك أنا عارفة إني مجرد فرد غاضب زي الملايين والكف مش ملاحق يمسح الدمع على مين وللا مين؟؟ عزيزة.. فين حضنك يا بلد؟؟ وليه ضحكتك..عن دنيتي تمشي؟؟ أنا عايزة حق الولد من غير ما أقول الحق فين أرجوكي ما تبقيش غريبة.. قاسيه ووجّاعة و لا عاميه و مطنّشه.. بايعانا و خدّاعة كوني عزيزة اللي طول عمري غطّيتها برمشي قويه وحنيّنه.. فايقه.. مش مستسلمه ودمّاعه