مقام الصبا

مظبوط مقامك ع الصبا...
يا ناى يتيم
غرقان فى دمعك م الفراق...
والهم غيم
مين اللى طبطب أو مسح...
من قلبك الجرح القديم؟
مين اللى دق الباب عليك
فاوقفت زى الضل خايف
والحزن صايبك فى الصميم؟
يا بحر ثاير ع الشطوط
تصرخ وخايف م الغرق
تصرخ بعلو الصوت
تقول:...
أنا أول الأيتام هنا
مولود فى هذا الكون يتيم
وكأنى "آدم"
والسما
أمى.. اللى فارقت من سنين
وكأنى فى الأرض الطريق
راحل ومش عارف لفين
وكأنى فى الوحده القمر
بيحاكى فوق النهر وشه
وكأنى طير
ومن الوجع...
بيهد عشه
وكأنى نور مكسور حزين
والهم بيت
بشويش...
باخشه
أصرخ بحرقه
وأنتفض...
من أى صوت
أرقص...
وضلى من الوجع
عصفور...
بيرقص ع الجدار
أهرب لضى يضلنى
فراش
وضى...
الوحده .. نار
مركب وعشمان فى الوصول
وشراعى بتهده الرياح
"يمنى قلبى بالأفراح
وأرجع وقلبى
كله جراح"
يا ليل يتيم
ازاى تقيم الطبل وانت بتنكسر؟
إزى هتفرح
أو تحس بطبطبه؟
وانت اللى مربوط ع الصبا
انظر لوشك فى الصور
الحزن باين يا صديق
رغم ابتسامك
رغم امتثالك للفرح
الدمع خانك
يا تخوض حروبك بالوجع
يا تموت كأنك نخل
ثابت...
فى مكانك.