حابى .. جوة قلبك ألف بكرة و ألف فكرة و نسمة و موال للفرح و أنا لسة بخاف .. من دمار شعلل ف الغيطان م اللى يتموا القطن و اغتالوا السنابل و حروف الازدهار بخاف م اللى سرقوا الأمانة و الأمان ..قتلوا البراءة وضحك الصغار صبحت حياتنا ليل أسود غطيس .. و الحلم ..جواك بيحلم بعدل .. بالنهار .. ......................................... إزاى آجى لك تانى و أتزف لك .. فين يا حابى العازفين .. فين الزينة .. و المواويل .. فين حنة كفوفى .. فين وشم القلوب اللى اترسمت على مرمرى بمحبتك .. فين كيان العشق و فرحتك .. فين المواكب فين الكواكب و المراكب و الكوكبة ؟ .. و فين جنتك ..؟! فين فستانى و تاجى .. ؟ راسى كان رافعها حبى لك و الكبرياء .. كان فوق ويا النجوم .. و السما كانت زى الوجد صافية من غير غيوم ... با حزن .. لما أفتكر الفستان الفضة المطرز بخيوط الشمس .. وحلقى المشغول بفيروز بلادى .. و أساور ستى .. دا تاريخ موروث .. فستانى الحلو طويل ..كان تل و أورجانزا يرفرف و بيرقص بطول النيل و مزخرف بنجوم الشوق .. و الجدة الحنانة تقول للقوم ممنوع اللمس و أنا باستنى فى الضفة التانية الطبل و الورد و الزغاريد والزمر وشعاع الود الصافى بيمرق من قلبى لكونك بيرتل و بيهمس همس ................................................................... فستانى يا عمرى .. إتلطخ دم .. و كورنيشه بيتلوى ..بيتنفس هم و صبحت أخاف من الورد ليكون حمرة خده من دم عيالنا اللى سايل كرهت الأحمر ف لون البلح و ف لون الشفايف .. و فى الضل اللى مايل لساك برضه تقدر تقول مش خايف ؟! لسة الخيانة و الضماير ميتة ... لسة دايرة المجزرة .. فروسية دى ؟ ... طب فين فارسنا .. فين جيوشك و صليل سيوفك يا عنترة .. موت ورعب .. من باب المنظرة ..؟ 1 دايرتنا مهما وسعت يا ابن خوفى صغيرة .. ................................................................... الدنيا .. يا ننى عمرى قصيرة .. و أنت و أنا عاشقين خلود .. لكن الوجع حرق و خلق مرارة فِ القلوب و الألم بقى صوته عالى .. و الحب .. إنت و أنا .. ؟! أبدا مش هوة ده عصرنا .. و الكابوس مش قصرنا .. أ .. ح .. ب .. ك .. أربع حروف ساجنها سور .. بتتحبس بين الشفايف مكبلها عتمة ليل خسيس .. إياك تقول إنك مش مرعوب زيى و خايف ... أنا يا ننى الروح حتى لما أسكنك .. قلبى بيتفزع فى كل صرخة الشفايف ترتعش و الكيان جوايا مفزوع وخايف ... حط فى عنيك عيونى ..بص لى ..ادخل جوة قمقمى و خد لك قرار .. من غير دهشة و لا انبهار .. قلبى العاشق فيك خايف .. برد الجسد واتجمدت قصور الشوق ..و سكن اسمك بين الشفايف .. إياك تقول لى يا روح الروح إنك مش خايف ...