بالتحديد يا حلاوة.. وجمال السيدات في المونديال

إيه الحلاوة دي.. وإيه الجمال ده.. وإيه المتعة دي في مونديال السيدات.. ومع الاعتذار لهن شعرت أنني أشاهد رجالة بتلعب بجد.. فن.. مهارة.. موهبة.. أعتقد أنها لو التقت أي فرقة حريمي مع أندية رجالي.. ستكون الغلبة والفوز والانتصار للجنس اللطيف.. يا ريت كل نجومنا ولاعبينا وحكامنا يكونوا شافوا مونديال الجمال والحلاوة يمكن يطلعوا بدروس مستفادة.. ربما تأتي أيام وتلتقي فرق الحريم مع الرجال.. ده حتي الحكم.. واحدة ست.. منتهي الحزم والجدية والرجولة.. القانون الكروي بحذافيره مافيش بقي حكاية الحكم بشر.. والحكم غصب عنه.. أصله ما شفش حاجة.. لا أصل اللاعبة بتمثل.. مافيش وقت زيادة علشان فرقة تغلب.. مافيش فرقة مكتوب عليها الغلب.. وأخري هي اللي تفوز أو تتعادل.. المهم لا تنهزم زي عندنا.
هذه دعوة مني لمن فاتته مباريات الدور الأول للمونديال اللطيف.. اتعلموا يا حكام.. ده حتي الجمهور حاجة تفرح بألوانه سيدات ورجال وأطفال.. مافيش الفاظ بزيئة ولا هتافات سيئة ولا لافتات مسيئة.. يا ريت نتعلم من الجنس اللطيف.
رسالتي لحكام الدوري المصري.. حقيقي انتوا بتحكموا ازاي.. كنت أتصور أن فيه واحد يغلط.. اتنين يغلطوا.. مش ثلاثة.. وأربعة.. إيه ده.. اسمه إيه.. وتقولوا الحكم بشر.. حقاً.. إنه بشر ومادام بشراً سيخطيء.. لأن من لا يخطيء هو واحد.. نبينا محمد صلي الله عليه وسلم مش كده ولا إيه.. من غير زعل.. عليه العوض.. ومنه العوض.. وقال زعلانين من الحكام الأجانب.. واسمحوا لي أقولكم .. من شاف بلاوي حكامنا.. هانت عليه بلاوي الحكم الهولندي.. مش كده ولا إيه.
الدوري انتهي.. والمولد ح ينفض تحية لأندية المقاصة وإنبي وسموحة ولا عزاء للزمالك والإسماعيلي واللي بالي.. بالك.. والحدق يفهم.