يا فتاح.. يا عليم!!

توصلت دراسة طبية إلي أن السيدات يستيقظن في الصباح معتلاَّت المزاج و"زهقانين" من عيشتهم أكثر من الرجال بسبب حاجتهن للنوم ساعات أكثر من الرجل.
أكدت الدراسة أن السيدات اللاتي لم يحصلن علي قسط كاف من النوم يستيقظن أكثر عبوساً مش طايقين "دبان" وشهم ويا ويله يا سواد ليله لو سألها جوزها: مالك يا حبيبتي بوزك شبرين ليه كدا عالصبح؟!
خد عندك: "مالو بوزي يا حيلة أمك.. دلوقتي مش عاجبك بوزي.. "البعيد" عامل لي فيها راجل واللا إيه"؟! رغم انه واقف قدامها مش "بعيد" خالص.. فكلمة 0بعيد" يا سادة كلمة مبهمة "حويطة" لا يدرك مغزاها إلا أجدادنا فهم بالتأكيد أول من استخدموها بس ياتري.. كانوا يقصدوا منها إيه.. الله أعلم.. إحساسي كدا بيقول إنها "شتيمة" فهي بدلاً من أن تقول له: يا بيئة يا قليل "الرباية" ياللي متسوايش في عيني "بصلة".. اختصرت كل هذه الكلمات في كلمة واحدة معبرة هي: "يا بعيد" وقد تعني هذه الكلمة أيضاً الدعاء والتمني علي الله أن "يبعده" عن وشها.. ويروح في ستين داهية.
أيها الزوج العزيز كن حريصاً ودعها تنام كيفما يحلو لها وإياك تعمل فيها أبو علي وتصحيها بدري عشان تحضرلك الفطار زي أفلام زمان. الكلام دا مش موجود لوقتي. تلاقيه فقط في كتب التراث باب "حق الزوج".
اسمع مني الكلمتين دول وخدهم نصيحة لوجه الله.. بعد العشا طبعاً المدام محتاجة تنام عشان عندها شغل الصبح يعني بلاش حركات نص كم انت مش قدها وخللي الليلة تعدي علي خير.. وياريت لو تحكي لها حكايات جميلة زي "السندريللا وسنو وايت" وبلاش حكاوي "الشاطر" حسن حفاظاً علي كرامتك!!
ويا سلام لو قدمت لها كوباية لبن دافيء من غير فورمالين مع أضواء خافتة من اللمبة الموقرة اللي في الأباجورة.. "تبقي العملية مية مية"!!
وإياك تكدب عليها وتغني لها أغاني "غير منطقية" زي "نام يا حبيبي نام.. وادبح لك "جوزين حمام""!!!
افتكاسات
* المرأة مثل بعض أنواع الساعات.. لا تعمل إلا بالهز!!
* إذا تزوجت امرأة مشغولة جداً برجل مشغول جداً جابوا ولد مش فاضي لهم!!