بالفيديو.. الأسطى “زلطة” يحلل سفر المتهمين الأمريكان: مادام “قبضنا” يبقى براءة.. ويابخت من قدر وعفي

* “المحلق السياسي”: المشير قال لن نركع عشان كدا أمريكا جابت الطيارة والبنزين ودفعت “أرضية”
* “زلطة”: عيب لما 85 مليون يتشطروا على 16 نفر ونطلع مش ولاد بلد قدام العالم كله
كتب- يوسف تاج:
استعرض الناشط، مدحت شاكر، مبتكر شخصية “الأسطى زلطة”، قضية تمويل منظمات المجتمع المدني، وسفر المتهمين الأمريكيين إلى بلادهم، بعد أسابيع من التهديد بأن مصر “لن تركع”.
وقال الأسطى “زلطة” في لقاء مع قناة “أون تي في لايف”، محللاً الوضع السياسي والدبلوماسي للأزمة بين القاهرة وواشنطن “مادام قبضنا وقفشنا منهم كام مليون يبقى براءة، ومادام عملنا “مصلحة” يبقى ما فيش مشاكل”، وأضاف:”أنا قررت أشتغل “محلق سياسي”، زي الجماعة اللي بيتطلعوا على التلفزيون دول، عشان الواحد لازم “يحلق” على السياسة لتروح كدا ولا كدا”.
وتابع “المحلق السياسي”:”مافيش مشاكل في سفرهم.. سيادة المشير قالك مصر لن تركع، وعشان كدا جابوا هما الطيارة الأمريكاني معاهم، عشان أزمة البنزين هنا، وكما الطيارة دي دفعت “أرضية” وشغلنا عجلة الانتاج في المطار”.
وحول العلاقات المستقبلية بين القاهرة وواشنطن قال “زلطة”:”عادي إحنا نعلق يافطة مكتوب عليها “يا بخت من قدر وعفي”، وهما 16 نفر وإحنا 85 مليون وعيب نتشطر عليهم يبقى منظرنا وحش ونطلع مش ولاد بلد قدام العالم، والمشير لما اتكلم قال كلام كبير أوي، وده أنا مش عارف أفهمه، لكن بالبلدي كدا، قالهم اللي هايجي هنا تاني هانرش عليه مية نار.. وإحنا خلاص كدا علمنا عليهم وقفشنا الفلوس”.
وأضاف “المحلق السياسي”:”لو كنا قعدناهم هنا زي ما بيقول الخونة اللي مش عايزين عجلة الانتاج تتنفخ، كنا هانتكلف بقى أكل وشرب وصابون عشان يستحموا، لكن كدا إحنا علمنا عليهم قدام العالم كله، واتعرف خلاص إننا في الافترا مفتريين ويا بخت من قدر وعفي”.