قصاصة وردية

القوصية أسيوط
أ نا يا صاحبي ..
ما عمر الحزن كان صاحبي ولا مرة بيتصاحب
وانا يا جاري ..
ماعمر الدمعة جت داري
ولا احزن ولا اعاتب
انا انسانة منسية
قصاصة من ورق وردي
ومطوية
ساعات اسلك سبيل الريح
واروح لبعيد بقلب جريح
لكنه عنيد
واشوف مجاريح
والاقي الجرح بيعلم علي المخاليق
والف طريق بيتسكر
واقول يمكن طريق تاني هنا مفتوح
بسرعة اروح
الاقي الدنيا مبتسمة بلون اصفر
بدون ما اتأني وافكر
اطلع لون كدة وردي
والونها .. الاقيها ما تتأثر
واعود امشي وانا بضحك
واقول غيري زمان شاطر
والاقي الصاحب الشاطر صبح غادر
اقول يمكن ماهوش قادر يكون زيي
ومين زيي
انا يمكن مانيش فاضية
ادور في الصحاب خلي واكون موجود
واقدم قلبي بأيديا
واقول الجودة في الموجود
الاقي الغربة بتعشش في كل قلوب
والاقي الحزن بيكرمش في كل وشوش
اقول مكتوب كدة عادي
وايه يعني ومايهمش
وعندي م الكلام ده كتير
بذور تترش حواليا وتطرح ورد
متفائل .. كتير عاقل
لاهي ريح ولا مطرة ماهوش سائل
دانا شاطرة
وبعرف اترجم احزاني
واللي جوة جواني
بكل لغات الفرح وانقلها لخلاني
يقولوا عليا مجنونه ومش فاهمة
وارد اضحك
واقول امتي الامل جوانا كان تهمة
زمان قالوا الفرح معدي
وكل الحزن بيعدي
وانا هارجع واقول تاني
والون كل احزاني بلون وردي
وراح يبقي النهار الجاي
يوم سعدي