7 معلومات عن التماسيح "المصرية": الثانية مرعبة

تداول نشطاء على مواقع التواصل الاجتماعي تدوينة كتبها شاب يدعى أحمد محسن ليكشف فيها حقيقة ظهور تماسيح بنهر النيل .
ولفت "محسن" إلى أن تماسيح نهر النيل - بمصر - من أخطر التماسيح على مستوى العالم ويعتبر من أكثر الحيوانات قتلاً للإنسان على مستوى أفريقيا .
وجاءت المعلومات كالتالي:
للناس اللي بتصطاد تماسيح صغيرة من النيل وفروعه .. واللي يقال انها عدت من السد العالي .. وفرحانة أوي بيها على انها كلاب لولو ومش هاتكبر .. ياريت يعرفوا المعلومتين تلاتة دول .
*
1 - تمساح النيل هو تاني أكبر الزواحف الموجودة على الكرة الارضية بعد تمساح المية المالحة في اسيا .. وبيوصل طول تمساح النيل البالغ 6.1 م .. ووزنه بيوصل ل 1090 كيلوا جرام ( طن وشوية ) .
*
2 - تصنيف علماء الاحياء لتمساح النيل هو انه حيوان ( شديد العدوانية ) من ( مفترسي القمة ) يعني رأس الهرم الغذائي .. ومفيش حيوان بيتغذى عليه .. لأنه على صراع دائم بين الأسود والنمور وفرس النهر ( السيد قشطة ) .. ونادرا جدا اما حد بيغلبوا فيهم .. بل انه بيهاجم أي حاجة تتاكل تيجي في محيط ما هو قاعد .. ومعظم الافلام اللي شفتوها للتماسيح اللي بتاكل غزلان وقرود وجاموس بري .. كل دي تصويرها في افريقيا وهي دي تماسيح النيل .
*
3 - تمساح النيل مصنف من الموسوعة البريطانية على انه ( حيوان ألمعي ) يعني شديد وحاد الذكاء .. لا يأمن منه الحيوانات شديدة السرعة ( خاطفة الحركة ) .. يعني الحيوانات الي بتمتلك حركة لحظية زي أنواع من الطيور السريعة جدا .. كل دول مش في امان لو هي قريبه منه .. ولو بمسافة طول جسمه بالكامل اللي هي ( 6 م ) .
*
4 - مصنف عالميا انه من الحيوانات الاكثر قتلا للانسان .. ومنظمة الصحة العالمية بتقدر الوفيات منه في افريقيا بالمئات كل سنة .. غير حالات البتر والقطع الغائر .
*
5 - بيضة تمساح النيل كلها على بعضها 5 سم .. وبيطلع منها حاجة شبه البرص او السحلية الكبيرة .. بس اما بيكبر بعد كام سنة بيبقى اد الاوضة .
*
6 - فبالله محدش يصطاده ويفكر ياخده يربيه .. عشان لما يكبر هاياكلك انت وعيلتك بدون تفكير .. ومحدش يفتكر انه هيشيله على كتفه زي تمساح ( اميتابتشان ) .. دوكها تمساح هندي صغير .. تمساح النيل قدوا كذا مرة .. ولو شاف الهندي ده هياكل منه لحد ما يشبع .
*
7 - لو خدنا بكلام وزارة الصحة بان التماسيح دي تماسيح مزارع وهربت للنيل .. ومش هي تماسيح النيل اللي في بحيرة ناصر وما بعدها .. يبقى اطمنوا .. بس مش أوي .. فاللي يلقى واحد صغير يوديه حديقة الحيوان .. واللي يلقى واحد كبير ياخد ديله في سنانه ويقول يافكيك . *
عشان الناس اللي بتتفزع وقلبها بيقف في صدرها .. الصورة بتاعة البوست مش لتمساح النيل نهائي .. ايحححححح الحمد لله .. طمنت قلوبنا دي صورة لتمساح البراري الافريقية في زيمباوبوي وترتيبه العاشر بين التماسيح .. تمساح النيل هو الثاني في الحجم والقوة يعني يفوق ده بكذا تمساح في القايمة