نشرت الفنانة نشوى مصطفى صورة يظهر بها عدد من طلاب الجامعة وهم يعملون على عربة بطاطا بمصر الجديدة، وواجهت على إثرها موجة نقد من قبل متابعيها، واتهموها بعدم الشعور بظروف الشباب، الذى لا يستطيع العمل بمجالاته ويضطر للعمل بأى مهنة ليوفر متطلبات حياته. وردت نشوى على متابعيها بالأنستجرام، قائلة: «طيب بمناسبة إنى شيرت صورة لشباب زى الورد بيبيعوا بطاطا، وقلت عفارم عليهم إنهم ما استسلموش للإحباط وللبطالة ولا قعدوا يولولو ويشتموا فى البلد، ونتيجة للردود اللى بعضها سخيف وبيقولو لى انتى فنانة بتاخدى فلوس أد كده ومش حاسة بالشباب المحبط وعايزانا بعد مانتخرج من كلياتنا المحترمة نبيع بطاطا، عايزة اقول لهم أولًا.. ابويا الله يرحمه كان من الطبقة الكادحة الطبقة تحت المتوسطة بشوية كتير.. ابويا ربانى انى اكون راجل.. بمعنى انى لما اتخرجت ومالقتش شغل عملت وجبات جاهزة فى البيت وبعتها فى العتبة للبياعين اللى بيشتغلوا فى محلات الملابس". وأضافت: "ليه العتبة بالذات.. لأنى فى إجازات الصيف بتاعت الجامعة كنت بشتغل بياعة فى المحلات دى علشان يكون معايا فلوس زيادة عن المصروف اللى باخده من أهلي، وليه عملت وجبات جاهزة وبعتها؟.. لانى كنت عايزة ادرس تمثيل.. دخلت المعهد وابتديت تمثيل بعشر مشاهد فى ضمير ابله حكمت وكان أجرى فى المسلسل كله 250 جنيه..كنت ساكنة فى شبرا بيتنا اوضتين.. دلوقتى بفضل ربنا وبمجهودى انا ساكنة فى فيلا دورين بحمام سباحة فى ارقى مكان فى التجمع الخامس". وتابعت: "اتعلمت فى مدارس حكومة وكنت باخد الكتب ببلاش فى الجامعة لانى كنت مقدمة مفردات مرتب والدى انها بسيطة.. دلوقتتى بفضل ربنا وبمجهودى ولادى جامعة أمريكية والمانية.. ماحدش ساعدنى غير ربنا مافيش منتج دعمنى وادانى بطولة وانا استاهلها بجدارة.. اثبت انى بمشهدبن تلاته ممكن اسيب تأثير واحقق نجومية باشوفها فى كلام معجبينى فى كل مكان جوه مصر وبراها.. انا بشتغل بمجهودى.. اتحاربت وصمدت اتساومت وما استسلمتش لانى مؤمنة بحلمى ومؤمنة بأن ربنا مع اللى بيتعب.. حارب علشان حلمك وماتشتمش بلدك ولا ظروفك ولاتشتم الممثلين".
