رسالة من إعلامية للرئيس والجهات الرسمية !!!

من بين الرسائل والإتصالات الكثيرة التى أتلقاها من داخل ماسبيرو يومياً , توقفت أمام ما جاء فى الرسالة التى وصلتنى من إحدى الإعلاميات الشهيرات داخل المبنى , ونظراً لأن رسالتها تضمنت الكشف عن العديد من الوقائع والمعلومات والأراء الجديرة بالدراسة والمناقشة رأيت أنه من الضرورى نشرها – كما وصلتنى وبدون أى تدخل منى - بهدف توصيلها الى كافة الجهات الرسمية والرقابية فى الدولة وفى مقدمتها بالطبع مؤسسة الرئاسة , حيث أنها تكشف عن أشياء قد لا يعرفها الكثيرين , و تحمل أفكاراً ربما يتم وضعها فى الإعتبار فى إطار برنامج إعادة هيكلة ماسبيرو وقطاعاته , كما أنها تكشف عن العديد من المهازل والتجاوزات التى تحدث داخل المبنى ويجب أن تكون هناك وسائل للتعامل معها والتصدى لها على وجه السرعة اذا كانت هناك نوايا جادة وصادقة للإصلاح والتطوير ومحاربة الفساد .. وفيما يلى أهم النقاط التى وردت فى هذه الرسالة :

- أعلى اجور توجد فى قطاع القنوات المتخصصة ( وفقا للرسالة وليس رأيى ) - اللى اصلا مش فى القانون - حيث أن مذيع الدرجة الأولى يتعدى أجره ال 15 الف جنيه شهرياً لأن اللائحة للمذيع درجة اولى عشرة الاف و 500 جنيه غير مرتب و حوافز - يعنى بيلم له اكثر من 14 أو 15 الف جنيه و هو بيعمل ايه بقى ؟ و معظمهم مش بيفك الخط و مستوايات ضعيفة .. أما مذيع الإذاعة فكل اللى بياخده خمسة آلاف و نصف كمرتب و حوافز و متغير !!! .. و هناك الكثير من مذيعى الإذاعة ( مديونين ) رغم أن مذيع الاذاعة اعداد و اخراج و تقديم و يجيب الطلبات للضيوف من البوفيه !!!

- برنامج الاذاعة من غير ميزانية .. رغم ان فيه اذاعات تجلب اعلانات بالملايين مش ملاحقين و المتخصصة و لا بيجيبوا " نكلة " فى الثقافية و لا " 3 " قنوات دراما و ملهمش لازمة و كذلك قناة نايل لايف .. الخ , قنوات ممكن تتقلص ل 3 قنوات - رياضة و منوعات شاملة و اطفال و خلاص -- القنوات المتخصصة بتلهف نص الميزانية و اصلا صفوت الشريف عملها سبوبة و خراب !!! .

- عايزين القنوات المتخصصة دى تتقلص متعرفش ليه " متسابة زى العمل الردى " و رواتب خرافية بدون وجه حق و لا حد بيشوفهم و لا بيسمعهم اصلا , ففيه اذاعات مثل " الشباب والرياضة " بتدخل ملايين و فترات مباعة و أصلا فى الشارع و مداخلات مع الشعب 24 ساعة .

- لو قلصوا القنوات المتخصصة دى و قعدوا المذيعين و استمروا فى اخذ رواتبهم - عارف ان ده أوفر مادياً - لانه هيوفر باقى ميزانية البرامج من سيارات و اضاءة و ديكور و تكاليف بث و نثريات الخ , و المصوريين يتوزعوا ولعلمك المصور من دوول بيشتغل بره فى قنوات خاصة و بيضرب الاوردر او يجيب واحد تبعه يدفع له اجرة الاوردر باليومية - تخيل ؟ مخرجين بقى -- كله بالدراع يعنى مش هتلاقى كتير دارس و لا غيره و بيشتغلوا فى القطاع الخاص برضه -- يعنى محدش هينضر اوى يعنى زى ما ممكن البعض يتخيل .

- باختصار المذيع فى الاذاعة " يتفك " بعشرة من التليفزيون – وفى الاذاعة سقف مستوى حتى أضعف ناس بها ممكن تلاقهم أعلى من أعلى واحد فى التليفزيون , و هناك خريجين اعلام شباب زى الفل قاعدين فى الشارع و مذيعات " مبعجرين " فاكرين نفسهم حاجة كويسة و هم لا شىء !!! زى اللى طلعت تهاجم السيسى لمجرد انها تشتهر -- نحن نعمل بالكلام -- مثل الاديب و الرداح المأجور -- ما الفرق ؟؟ الاديب يصيغ نقدا فى صورة أعمال ادبية و فكرية و الرداح بيشتم بس بيلفت الانظار !!! .

- ماسبيرو بكل قطاعاته المرئية خسارة على البلد فعلا .. شوف كام قناة متخصصة ملهمش لازمة و قنوات اقليمية وثلات قنوات قطاع تليفزيون و قناة معلومات و لا لها أى دور و النيل الدولية , كلها قنوات موكوسة و رواتب خيالية و ميزانيات و ديكورات للبرامج بدون أى فايدة .

- معظم العاملين فى ماسبيرو بيشتغلوا بره فى القنوات الخاصة و بيتعاملوا فى المبنى على أنه سبوبة و الزوجة الثانية حاجة تقرف بجد !!!!

- رئيس التليفزيون تحس انه رئيس عصابة شكله و طريقته .. و رئيسة الاذاعة عاوزة تقعد على الكرسى متشيلش قشة و كانت خوافة أيام الاخوان و قبل الاخوان !!! .

- نفسى نشتغل على اعادة الهيكلة بجد و اعادة التقييم للناس .. اساس المذيع الثقافة و الصوت و لو تليفزيون يبقى القابلية -- مش الاشكال دى -- خلقة ربنا كلها كويسة لكن لكل وظيفة مقومات .. بقت حاجة تقرف و مفيش دماء جديدة و لو دخلوا حد بيقى ابن حد فيهم او قريب حد او بواسطة , و لا كأن فيه شعب خالص يتعمل له اختبارات و مسابقات بجد , و يطلع بعضهم يردد عبارات ده اعلام الشعب -- طيب اصلا يا اختى يا تليفزيونية دخلتى ازاى ؟ ابوها كان عضو مجلس شعب عن الحزب الوطنى او قريبها .. لو حد قالك فى اى إعلامى مرئى عندنا انه دخل من غير واسطة -- بكل ثقة اقلع اللى فى رجلك و اسكعه على طول !!!