6 إبريل للشباب: "انتوا مش لوحدكو"

مع اقتراب ذكرى يناير الخامسة..

قالت حركة شباب 6 إبريل "الجبهة الديمقراطية"، إن الثورات والموجات الثورية تستمر لسنوات طويلة ولا أحد يستطيع أن يقوم بوقفها، مشيرين إلى أن الثورة كانت تنادى بالعدل والحق والحرية ولابد من انتصارها فى النهاية.
وأضافت الحركة فى تدوينة عبر صفحتها الرسمية بموقع التواصل الاجتماعى "فيسبوك" بالتزامن مع اقتراب الذكرى الخامسة ل"ثورة 25 يناير": "كل اللى شارك فى الثورة وجاله إحباط أو خنقة أو كفر بحلم التغيير عشان حاسس إن عقدنا انفرط.. انت مش لوحدك كل اللى جايب آخره من الظلم والدم والفقر والجهل وفاكر إن الناس مش هتقوم تانى.. انت مش لوحدك".
وتابعت الحركة: "كل اللى قرفان من الوضع الاقتصادى والدنيا مش مظبوطة معاه والشغل مش تمام ومتخيل إن خلاص كدة ملهاش عدلة.. مش لوحدك، كل اللى بدأ يفقد الأمل فى تحقيق أهداف الثورة فى يوم من الأيام و مش شايف للشباب تجميعة تانية.. ما تقلقش.. انت مش لوحدك".
واختتمت الحركة تدوينتها: "اللى لمس الحلم بإيده عمره ما هيتنازل عن تحقيقه.. الشهادة شرف.. والسجن ثمن ندفعه عن طيب خاطر.. إحنا بس عطلانين علشان كل واحد متخيل إنه فى جزيرة لوحده.. مع إننا لو بصينا حوالينا كويس هنشوف بعض.. وهنرجع تانى فى كتف بعض.. صدق بس إنك فعلًا مش لوحدك".