حسني ل"مؤيدي السيسي": انتوا عايزين اللي يطبلكم

سخر الدكتور حازم حسني - الاستاذ بكلية الاقتصاد والعلوم السياسية - ممن اسماهم "المبسوطين" من انجازات الرئيس عبد الفتاح السيسي مبدياً استغرابه من غضبهم من انتقاداته الموجهة لتلك الانجازات .
وقال حسني في تدوينة : حقيقة لا أعرف سر غضب المبسوطين من إنجازات السيسى غير المسبوقة من موقفى الحذر من هذه الإنجازات، أو حتى الكاشف لعوار الحديث عن إيجابياتها أو المشكك فى وجودها أصلاً!! ... هو احنا لازم نمسك لكم الطبلة، أو نتحزم لكم ونرقص على طبلتكم، عشان نبقى ناس كيوت ومش سوداويين؟ "بحسب تساؤلاته".

وأضاف: تخيلوا إنكم راكبين عربية رولز رويس، وإن واحد سوداوى زى حالاتى فات جنبكم وقال لكم إنها مش رولز رويس، تفتكروا كلامى ده ح يقلبها فيات، أو ح يسخطها عربية رمسيس؟ ... طيب تخيلوا إنها عربية كارو، وإن واحد زى حالاتى وزع معاكم الشربات وهناكم بالعربية الرولز رويس، تفتكروا إن التفاؤل العبيط ده ح يحول الكارو ولو لفولكس فاجن خنفسة؟ "بحسب قوله"
وأردف: هو مين اللى مزعلكم؟ ... أنا لأنى مش مصدق اللواء عبد العاطى، واللا انتم لما بعتم مخكم وصدقتوه هو وقياداته، واللا زعلانين من اللى خلاكم تفرحوا فرح عبيط بفنكوش ما لوش أى وجود؟!! .... أنا اللى باقول إن مشروع قناة السويس الجديدة ده مجرد تفريعة لقناة السويس القديمة، وربما كان إنجازاً هندسياً كبيراً فى وقت قياسى ، لكنها بلا عقل اقتصادى، واللا انتم اللى صدقتوا إنها ح تمطر على مصر مليارات، واللا اللى خدعكم وقال لكم إن عدد السفن ح يزيد واكتشفتم إنه لا زاد ولا حاجة، وإن حفر التفريعة لم تكن له أولوية على الإطلاق؟ "بحسب رأيه"
وأستدرك: ما تسيبوكم منى ... واحد سوداوى وحاقد وبيشكك فى كل الإنجازات العظيمة اللى انتم راسمينها فى دماغكم ... إيه اللى مزعلكم فى كده ما دام الواقع بيقول غير اللى أنا باقوله؟ ... مزرزرين ليه مادام جهاز معالجة الفيروسات شغال ما شاء الله، ومادام عدد السفن بيتكاثر والحمد لله، ومادمتم راكبين الرولزرويس والحمد لله؟ زعلانين منى، واللا من نفسكم، واللا من اللى وعدكم بالحلق وقال لكم خرموا انتو بس ودانكم والحلق زمانه جاى فى السكة؟ "بحسب وصفه"
وأنهى كلامه ساخراً : حرصوا انتوا بس على عقولكم من الناس الظلاميين اللى زى حالاتى وانتو ح تبقوا كويسين قوى ... بعد سنة ... اتنين ... تلاتة ... أربعة ... ويا عالم، يمكن تضربوا الرقم القياسى فى الانتظار وتدخلوا موسوعة جينيس 2 "بحسب تأكيده"