«تمرد» ل السيسي: «شعبك قرف وزهق وبنتعامل زي العبيد»

هاجم حسن شاهين، المتحدث الرسمي لحركة «تمرد» النظام المصري، وطالب الرئيس عبدالفتاح السيسي بالنزول للشارع، ليرى بنفسه الفساد، وأن النظام ما زال يعالج الأخطاء والمصائب بنفس الطرق السلبية.
وقال «شاهين» - عبر صفحته الشخصية على موقع التواصل الاجتماعي «فيسبوك» - «كفاية كدب بقى، كفاية عك بقى، لسه جهاز الدولة مش عايز يخرج من عقليته اللي انتهت من العصر الحجري، لسه جهاز الدولة بيعالج الأخطاء والمصائب بنفس الطرق السلبية».
وتابع «شاهين» قائلًا: إنت فين يا سيادة رئيس الجمهورية، إنزل بقى وشوف البلد من تحت كل اللي حواليك بيغشوك، إنت عارف كده ولا مش عارف، إنزل يا سيادة الرئيس شوف حال الشباب اللي طالع عينه عشان نفسه بس يعيش عيشة كريمة وياخد أبسط حقوقه إنه يعرف يشتغل.
وأضاف المتحدث السابق باسم «تمرد»: إنزل يا سيادة الرئيس شوف كبار الحرامية اللي رجعوا تاني يدوسوا على الشعب والشباب، إنزل شوف مسؤولينك في كل الأجهزة اللي مربطين تربيطات بعينها كلها محسوبية لصالح ناس بعينها، كان باقي الناس ملهاش قيمة أصلًا، إن حد يسمعها.
وأكمل حديثه: إنزل شوف غلاء الأسعار والسوق السودا والداخلية اللي بتتعامل مع الشعب على إنه عبيد عندهم ورجعوا تاني لنفس الطرق القذرة ومش حادثة واحدة، لا ده كل يوم بتتكرر حوادث كتيير.
وطالب السيسي قائلًا: إنزل شوف المستشفيات والناس اللي بتموت بسبب الإهمال، انزل شوف حالات كتيير بتموت بنفس أعراض مرض واحد، من الممكن يكون وباء فعلًا، ووزير الصحة بينفي أصلًا كل حاجة ومش بيتكلم بصراحة، إنزل شوف الفساد اللي واكل عضم البلد، إنزل شوف حاجات كتيير أوي شعبك تعب وقرف وزهق، إنزل يا سيادة الرئيس للأرض وبص للناس والشعب والشباب، قبل ما نقول ياريت اللي جرى ما كان، اللهم بلغنا اللهم فاشهد.