على قنديل ينجح في الحصول على مسرح الكوميديان الشاب

نجحت الحملة التي أطلقها الكوميديان الشاب علي قنديل تحت عنوان "عايز مسرح" والتي طالب فيها الدولة بتمكينه من أحد المسارح البالية المهجورة، على أن يقوم هو وفرقته بإعادة إحيائه ويقدمون عليه عروضهم لمدة 3 سنوات.
وقال "قنديل"، عبر صفحته على فيس بوك: بطلب من رئيس الجمهورية أكون مسؤول تمامًا عن أي مسرح مهجور ومتهالك تابع للدولة لمدة 3 سنين، أنا وفريقي هنتكفل بكل حاجة في المسرح ده، وننظم مهرجانات لفرق المسرح في الجامعات، مهرجانات مسرحيات الشخص الواحد، مهرجانات مسرحيات الديو دراما، ومسرح الطفل، وحفلات ستاندب كوميدي، حفلات غنائية، ورش التعليم والتدريب فنون " مزيكا- رسم – تمثيل- ستاندب كوميدي"، بالإضافة إلى تقديم ندوات شعرية وأمسيات ثقافية.
وأضاف: مصر فيها عدد مهول من الموهوبين اللي بيشتغلوا في مجالات غير موهبتهم عشان أكل العيش، وفي موظفين بتاخد مرتبات عشان بيشتغلوا في مسارح وهم مش طايقين شغلهم! واحنا بندفع ضرايب.. والمسارح مقفولة..
المشروع ده هيوفّر: مناخ محترم لمواهب عديدة، فرص عمل كتير (التشطيبات والترميمات)، تنشيط حركة السوق في مواد البناء، فن مُحترم يواجه العك اللي بيحصل ده.
وأشار "قنديل" إلى أنه نجح في الحصول على أحد المسارح المتهالكة، وسيقوم بإصلاحه فرقته، قائلًا: "قدرت تدخل مسرح مهجور ومتهالك تمامًا، تابع للدولة بالمناسبة، الحملة أي إنسان هيشوف حالته هيصعب عليه إن المكان الرائع ده دلوقتي خربان كده! مياه مفتوحة في الحمامات تحت، حيث الأساسات اللي بتبوش: مسرح مقفول بقاله أكتر من 12 سنة، قطة (أو كلب) مش فاضل منها غير شوية من الجمجمة! وشوية شعر كده، فضلات فيران في كل حتة، خشبة مسرح دايبة تمامًا ومخرّمة، كراسي متقطعة، سلاك الكهربا مقطوعة كلها بفعل فاعل، مش دايبة سقف متكسّر".
وأضاف: ده واحد من المسارح اللي إحنا قادرين نشغلّها.. وبسهولة كمان.