مصر هنا مش هناك

البلد بطنها بره؟
هى من امتى كانت جوه
ننتظر قليلا
30 سنه منتظريين
شكلك صدقت الحكايه
أقرا الجرايد
الرئيس تعبان , نفسيته وحشه , مراته مانعه الزيارة
عياله معاهم هواتف فى السجن
المسئول ....والمصحف الشريف ماحصل زيهم زى أى مساجين الكل سواسيه عندنا
الرئيس زائغ النظرات
عنده اكتئاب
صحته ما تستحملش مستشفى طره
لا نوديه طره
انتظروا شويه نجهزها
الشعب هايج
عايزين ناكل
حتاكلوا بس بلاش فئويه
البلد أكبر من الأفراد
شكلكوا من فلول الوطنى
مشادات بين الكبار فى السجن
نوادر واطايب أكلاتهم
عايزين ناكل
اخرسوا
ماانتوا جعانين من 30 سنه حبكت تأكلوا الأن
ورانا أهم
النيل والمايه
المسرطنات وصفقاتها
عايزين نكسب حاجة فى الزحمه دى
الخليج هايج علينا
مصيبة ليبعت المصريين أل عنده
ايه رأيكوا طلعوا الصور بتاعه التحرير من موبايلاتكوا اتفرجوا عليها وشوفوا ازاى كنتوا رجاله
جعانين عايزين ناكل اى حاجة نسد جوعنا
واللهى مش فاضيين
عندنا محطة مترو عايزين نغير اسمها من ال ما يتسمى
والجماعه ال بيسندونا ويدلعونا ويمكيجونا لازم نعمل لهم واجب ونغير لهم كام رئيس تحرير , بدل ما نسمع كلمه من هنا ولا من هنا مش حنعرف نسد
ودا مش فئويه ؟
فئوية ايه الله يخرب بيوتكوا دول الاعلام الاعلام ال بيقولوا وأنتوا تصدقوا لازم ياكلوا كثير ويشربوا كثير بردو ويغيروا عربيات والذى منه , وكلة بالدور وال جه علية الدور لازم يشبع وياخد دوره .
بس ينورونا
يظبطوا الليله
شوية موازنه
مش كله أخبار الميتم ونوادره
شويه مستقبل , شويه جد ,نقد , لماذا, كيف , حساب , تفتيح عيون , ليه عملت ياوزير المفروض كذا , عشان نصدق انهم اتحولوا واتبصروا وكانوا صحيح مخدوعين أو حتى مضطرين
جعانين عايزين ناكل احنا كمان
ليه ؟
من زمان بتاكلوا معنويات
بنحاكم الكبار
وحنبنى مساكن وحندى قرض
وسجلتوا جوابات تقدموا للوظايف
وحنبنى لكوا مساكن
ونشوف مشاكل كليات ولادكوا
الله يوجع دماغهم
وحناكل امتى
تأكلوا ايه ؟
مااحنا بناكل فول فوووووووووول فاهمين فوووووول
و الأعلام نقل لكوا وانتوا شفتوا على الفيس والبيس بتاعكوا
كلوا فول
ماله الفول
جعانين .
واحنا مش بنلعب
الناس بتدعى لنا فى الكعبة وعلى الشموع
اتعظوا يا ........
جعانين
عايزين ناكل
اعمل حاجه واحده فوريه
او ادينا معاد أى معاد
قول حاجه مفهومة
متشافه, ملموسه, نمسكها , بلاش نمسكها , نلمسها أو نبص عليها من بعيد
أقولك بلاش تعمل
رجع تانى
رجع الحاجة زى ثمنها الأول الفول غالى , والطماطم ولعت , والسكر طار , والزيت والرز بقوا حلم,
واللحمة أم دوود غاليه ما نقدرش عليها
سيب شويه لله
مفيش كبير عليه
جعانين عايزين ناكل
مش فاضى
البلد بتغلى
السلفين مجننين عيشتنا
والأخوان مش داخل علينا كلامهم,
وعندى قعدة هنا , وشاى هناك , لما أفضى .
بابى مفتوح وبكل الأحترام والود واديكوا شفتوا جبت الجزمة بنفسى بعد الست ما خلعتها على باب مكتبى
دى معنويات وأصل طيب
بس جعانين عايزين ناكل
اخلص البلد من البلطجيه وارجع لكوا
مش عندك ظباط؟
اعمل ايه ؟
عاندين زيكوا
طيب
وبعدها تروق لنا؟
مش علطول
عندى قعدة عرفى
وبعدين حفلة الجايزة
والعلماء
اوعوا تنسوا العلماء دول مستقبلكوا الحقيقى
ومش عايزين نكرر الغلط ونطنشهم
بس احنا جعانين
وانت بتقول علينا فقرا
وعندك أرض مصر واسعه
ادينا نزرع وناكل بدال الغريب , وحواديت الأستثمار , استثمرنا الأول
وبلاش القصص القديمه
احنا أولى بدال خدمتنا فى الناس
برا وجوا
ننتج ونسوق ونشبع ونسكن ونلبس وناكل
عايزين ناكل
البلد الحقيقيه عايزة تاكل
الباقيين مش هما البلد
دول للعرض والكلام فقط
البلد الحقيقيه هى ال جابتك وعلى الكرسى قعدتك
الباقيين هما ال بيلاعبوك
هما ال عاملين الدوامة عشان ماتفوقش
ما تنتبهش , تتشتت وتشتت
توعد وتخلف
ولما تتكلم ما تقولش حاجه
وتفضل تاخد الدعاء
لعل وعسى
تحارب أجهزة الدكتور أعدائها
وتمارس ادوارها
وتتفرغ زراعا الدكتور لاحتضان ملموس محسوس
مشموم لمصر التى رفعتك فى ميدان تحريرها
nagwaaaa@hotmail.com