تحقيق

س انت متهم بالتبرع للفقراء ؟
ج محصلش وانا راجل طول عمرى بخيل جلدة واسألوا مراتى وعيالى يشهدوا انى انا منشفها عليهم .
س . كما انك متهم وآخرين بتأسيس جمعية مشهرة بوزارة الشؤون الاجتماعية الغرض منها كفالة الايتام وتقديم العون لهم على اساس دينى ؟
ج . محصلش وانا اساسا راجل معنديش دين واسألوا امام المسجد المجاور لبيتى يشهد انى عمرى ما ركعتها
س . ما قولك وقد قرر الضابط مجرى التحريات انه شاهدك وانت توزع التمر على المارة قبل اذان المغرب فى اول أيام رمضان ؟
ج أيوه فعلا الكلام ده حصل لكن ممكن يكون الظابط مخدش باله انى كنت ببيع التمر الثلاثة بجنيه كنوع من الاستغلال .
ملحوظة : قمنا بعرض المستندات الصادرة من وزارة الشؤون الاجتماعية ثابت بها عضوية المتهم فى احدى الجمعيات الخيرية .
س ما قولك فى هذه المستندات ؟
ج . نعم انا عضو فى هذه الجمعية وهى مختصة بتكريم الموتى ، واشتركت فيها علشان لما ابويا وامى يموتوا استفيد بالاعانة والكفن المجانى والدفن فى المقابر المملوكة للجمعية . فى مقابل اننى كنت اقوم بتغسيل الموتى لحساب الجمعية مقابل اجر رمزى .
س وهل تحقق لك ذلك ؟
ج . نعم لما ابويا مات السنة اللى فاتت ، سلمونى كفن وخمسين جنيه اعانة ودفنوه فى مقابر الصدقة المملوكة للجمعية .
س انت متهم بتلقى تمويل نقدى ( خمسين جنيه ) وتمويل عينى عبارة عن ( كفن مكون من ثلاث قطع من القماش الأبيض ) من جمعية ارهابية .
ج انا مش ارهابى وعمرى ما ترهبنت وانا متزوج ومعايا ثلاث اولاد يبقى مترهبن ازاى .
س كما انك متهم بالاشتراك مع آخرين فى ارتكاب جرائم غسيل الأموات؟ .
ج انا معرفش ان دى جريمة ، دى حاجة ربنا امر بيها ومن الدين .
س . اذن فأنت متهم بانتحال شخصية رجل دين .
ج ياباشا انا معرفش حاجة وبتوع الجمعية (ولاد دين ال ....) هم اللى ورطونى .
غلط كده متسبش الدين .. انت متعرفش ان اللى يسب الدين يبقى كافر .
بجد ياباشا ؟ يعنى انا كده كافر ... يعنى براءة ياباشا الحمد لله .

عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته.