ثائر فى دولاب مبارك

ايوه يامواطن يابن الوس انا الظابط والرابط وتقولى ياباشا-
مش عاجبك هقلعك هدومك واخصيك واخلع ظوافرك بالكماشة
بتشتغل ايه ياض و ايه اللى وداك التحرير يا جربوع ؟
رحت انصر وطن بيشتكى من القهر والكذب والبهدلة والجوع*
وبشتغل على باب الله بمسح جزم وخريج تجارة ومتعلم
وكمان ورنيش يا صايع يابن الوس-
يا باشا عيب دنا بدافع عنك عشان تعيش *
وانت بقى اللى هتعيشنى يابتاع الورنيش-
إن ما ربيتك و نسيتك اللى اسمها ثورة وخليت كرامتك مافيش
ياباشا طيب فك الكلابشات حرام عليك ونتكلم*
حرمت عليك عيشتك وازاى اسيبك من غير ما تتألم-
طيب اسألك سؤال يابشا*
ليه بتعمل فينا كده
لانو لازم تنكسر عشان انا اعيش-
ياباشا طيب وايه فايدة العيشة والشعب اسير ؟*
يا مغفل انا اللى كسر جبروتى الشعب ... وانا الكبير-
ولازم يرجع القمقم من تانى ويذوق السعير
ياباشا انتو بتجيبوا الكفر ده كله منين مش كنا خلصنا م التعذيب والاغتصاب و العيب*
اومال عملنا ثورة ليه ؟ لا يمكن نرضى تانى بالمهانة
هههههههههه ضحكتنى يابن الجربانة-
تعرف يا مواطن بابن الوس مش هينفع معاك غير دولاب مبارك
!! دولاب مبارك*
ايوه دولاب مبارك .. وفيه من العذاب الوان وتتمنى الموت او تقول انا جبان-
مش مبارك اتخلع ودلوقتى سجين ؟*
اينعم يا مغفل لكن دولابه لسه متين-
بيتسلم من حاكم لحاكم ومفاتيحه للحاكمين
يعنى فى نسخة مع مرسى ؟ يادى الواقعة الطين*
ايوه .. والنسخة بياخدها اللى يقعد ع الكرسى-
اومال قالولنا انتخبوا ليه المتدين وبيخاف ربنا وحنين*
واللى يقول وا مرساه يجيله على رهوان ويعمل الخير وما يبين
هههههه اصلك مغفل وبريالة يجيلك انت يا زبالة ؟-
قول وا مرساه للصبح لا هيسمعك ولا يحس احساسك
طيب وليه تطيعه زى الخروف وتهين اهلك وناسك *
انا شغلتى كده مع الطغاة من غير تفكير خادم ومطيع-
طيب وانت كده تفرق ايه عن القطيع ؟*
اخرس يا جربوع يابن الوس وكلمنى وانت مطاطى راسك-
انا برفض اهانتك وهقطع لسانك واربط لجامك*
وثورة تانية تشيل دولابك وتعرف مقامك
يا عسكرى ... دخله دولاب مبارك ولبسه طرحة نسوان-
عايزك تخلى ليله نهار الثورجى الجربان
حاضر ياباشا بس فى صوت ثورة برة والشعب ثاير#
ههههههه عملها قبل كده المغفل وسلم ذقنه للاخوان-
مبارك هو مرسى ... وقاعد على نفس الكرسى
شوف يا عسكرى
اضرب عليهم نار من غير تفاهم ولا حوار
ودى طريقة مجربينها ,, دول مش ثوار
وبعد ما تخلص ثورتهم نتاسف ونعتذر ونرجعلهم بدولاب مبارك
ايوه ياباشا بس المرادى جايين يكسرو دولاب مبارك#
يبقى كده ياباشا غلب حمارى و حمارك
....الثورة مستمرة
أرسل مقالك للنشر هنا وتجنب ما يجرح المشاعر والمقدسات والآداب العامة
page2almesryoon@yahoo.com