لست جميلة

من فضلك أرجوكى لا تهزئي برسالتى, أنا بعترف إنى مش جميلة لكن الموضوع ده مؤرقنى نفسياً لدرجة أنى مش قادرة أواجه الناس وشخصيتى ضعيفة جدًا ومش عارفة إزاى أواجه الحياة ومخنوووووووووووووووقة وكمان مش عارفة ليه بعتلك الاعتراف ده..
نفسى حضرتك اللى تكلمينى وتحاولى تحلى مشكلتى وأرجوكى لا تدخلى أى شخص أخر ولا تستشيرى طبيب نفسى لأنى فعلا ذهبت لاستشارى نفسى ولم يقنعنى أرجوكى تقوللى أعمل إيه يا أ. أميمة.
(الحل)
حبيبتى الجمال ده مسألة نسبية بحتة, بمعنى أنك ممكن تحكمى على شخص إن نسبة جماله عالية جداً فى حين أنى ممكن أشوفه غير كده وجماله وشكله عادى خالص, والعكس صحيح, إذاً انتى لا يمكنك إنك تحكمى على نفسك أنك جميلة أو غير جميلة, وحكمك ده أو وجهة نظرك اللى بتعكسهالك المرايا غير صحيحة أكيد من وجهة نظر البعض, إبحثى عن جمالك من الداخل وعن إمكانياتك ومهاراتك وروضى روحك لتصبح جميلة حقاً, وتنعكس هذه الروح على وجهك فيراكى الجميع دائمًا قمر ومتألقة بأسلوب منفرد...
وكم من ملكات للجمال معاملاتهم سيئة للغاية فتنعكس عليهن قبحاً وبذاءة ..
حبيبتى…وددت أن أنصحك بهذه الكلمات البسيطة لعلك تعيها جيداً,, لقد خلقنا الله سبحانه وتعالى لنكون أسباباً نخدم بعضنا البعض, لا لنكون تابلوهات بلا قيمة لكى يشاهدنا الآخرون..
فلابد أن تجعلى من جسدك طاقة منتجة بدلا من أن تنسحبى من مجتمعك معترضة على الهيئة والشكل الذى اختاره الله لكى, وأنا تحت أمرك يا قمراية فى أى وقت ستجدينى بجانبك أخت لك دائماً إن شاء الله .
لإرسال مشكلتك والتواصل مع الأستاذة/أميمة السيد
almesryoon.openheart@gmail.com