"مش هنسيب الجزيرة وسيبنا في حالنا خلينا نعيش"

"سيبنا في حالنا، إحنا بنموت بالحياة هنا عشان مفيش خدمات وراضين، جبتلنا الفقر والذل، مش هنسيب الجزيرة حتى لو موتنا زي ماعملت في الوراق".. كلمات رددتها إحدى سيدات أهالي "جزيرة الذهب" وهي في حالة شديدة من القلق والخوف من تكرار ما حدث في "جزيرة الوراق"، قبل أيام قليلة وتهجيرهم من بيوتهم وضرب الأهالي وأخذ أرضهم وبيعها للمستثمرين على حسب قولها.
وأضافت السيدة: "جزيرة الدهب" مفيش فيها خدمات خالص لا مستشفى ولا وحدة صحية ولا حتى في مدرسة عشان أولادنا تتعلم فيها، وراضين بالهم اللي إحنا فيه وساكتين عشان نعيش ليه بقي عاوزين تمشونا من بيوتنا وتاخدو أرضنا مننا".
وتابعت: "اللي حصل في "جزيرة الوراق" ظلم وميرضيش ربنا، ولو حصل معانا كده مش هنسكت ونسيب حقنا وأرضنا وأرض أجدادنا اللي جمال عبدالناصر أديها لينا سنة 56، إحنا مش بلطجية ولا خارجين عن القانون ولا إرهابيين زى ماقالوا على أهالي جزيرة الوراق عشان دافعوا عن أرضهم".
واستكملت: "السيسي غلّى كل حاجة علينا وجبلنا الفقر والذل وفي الآخر عاوزه ياخد الجزيرة مننا عشان يبيعها للمستثمرين"، متابعة: "حرام عليك ياريس ابعد عننا وسيبنا في حالنا، انت غليت كل حاجة علينا ومش عارفين نعيش بسببك، وشباب كتير من أهالي الجزيرة عاطلين ومش لاقين شغل واللي بيشتغل ب100 جنيه في اليوم مش بتكفي مصاريف بسبب ارتفاع الأسعار اللي بقينا فيه".