تفاصيل "استعباد" شباب الإخوان بالسودان

قيادي ب"الجبهة السلفية" يروي:

كشف الدكتور محمد جلال - القيادي بالجبهة السلفية - تفاصيل ما أسماه إذلال شباب الإخوان الفارين من مصر على يد قيادات الجماعة بالسودان .
وقال "جلال" في تدوينة عبر حسابه الشخصي ب"فيس بوك": "لما ولد 16 سنة من الشباب اللي اتأذوا في مصر واتبهدلوا وطلع عينهم سجون واحكام ومطاردة .. وأخيرا يخرج بره مصر ف رحلة ممكن توصل لأسبوع ف الصحرا بيشوف فيها الموت بعنيه ويجيلك السودان يبقى محتاج منك احتواء .. محتاج منك معالجة نفسية لمشاكله .. قعدات تربوية وتحفيز وتنظيم لحياته .. هو في مرحلة ووضع مضطرب نفسيا جدا .. مش ناقص يعني" .. مضيفًا: "السودان صارت جحيم على الشباب هناك .. أنا أعرف أكتر من واحد رجعوا مصر قالوا نتمسك وسط أهلنا احسن ما يتحكم فينا حد .. بعد اللي قدمه الشباب دول ف مصر يجي واحد له سلطة يقولهم : (أنا بأكلكم وأشربكم وملكوش حق تتكلموا) (اللي يتقال لكم تسمعوه بدون نقاش) ".
وأضاف: "الشباب دول هربوا من استعباد السيسي ف مصر عشان يروحوا لاستعباد الاخوان ف السودان .. الجيل ده أصلا جيل حر وعمره ما هيبقى تابع لحد عشان فلوس" .. مضيفًا: "الشباب بيفضلوا الموت ف الصحراء دلوقتي عن إخوان السودان .. بيفضلوا يرجعوا يقضوا الاحكام اللي عليهم ف مصر عن إخوان السودان".
وأردف: "فيه شاب مسؤوله ضربه علشان اعترض .. وفيه شباب كتير اتطردوا من السكن وباتوا ليالي ف الشارع .. وفيه شباب خدوا جوازات سفرهم وحرموهم من السفر .. وفي شباب اتهموهم أنهم هيسافروا داعش وكادوا يضيعوا مستقبلهم" .. مستدركًا: "مسئولين السودان دول لا شافوا ثورة ولا فاهمين نفسيات الشباب ولا عقولهم وفاكرين انهم بالشدة هيسيطروا .. لدرجة إنهم بيحققوا مع أي حد من الشباب كتب أي نقد على الانترنت لهم زي السيسي تمام .. افهموها بقى يا أغبياء .. الجيل ده ملوش تبعية لحد .. جيل بيفكر يا تفهموه بالعقل يا تتنحوا ".
واستدرك: "ثم إن الفلوس دي من جيوب الإخوان وبتروح للإخوان .. تتحكموا فيها ليه .. ده مال الله مش مال أبوكم .. انتوا خربتوها مرة وبتخربوها تاني وتالت ومش مكتفين بكده لا كمان بتضيعوا ما تبقى لديكم من راس مال .. شبابكم .. للأسف الشديد .. إخوان السودان الوجه الآخر للسيسي .. أنقذوا شباب السودان قبل ما يموتوا ف الصحراء أو يتدمروا نفسيا من ناس معندهاش ريحة المسؤولية" .