على: الدكان هايبقى سوبر ماركت.. ومش راجع الشارع تانى

شاب هادئ، يتكلم بصوت منخفض كأنه يحدثك عن «سر الكون». إنه على، الذى ذاق مرارة الشارع، خرج الآن للدنيا يحاول أن يجد مكانا تحت الشمس ضمن مشروع اليونيسيف: «عندى 21 سنة، كنت ساكن مع أهلى فى ناهيا البلد، أبويا كان مستريح ومعاه فلوس.. انفصل هو وأمى، وكل واحد منهم اتجوز حد تانى، أبويا اتجوز أربع ستات وكانوا عايشين كلهم فى مكان واحد، وجاب خمس عيال.. كنت عايش مع أبويا بس الستات اللى اتجوزهم كانوا قاسيين أوى فهربت منهم وقلت الشارع أرحم.
ومن وقتها ماحدش سأل عليا، وأنا كمان مكنتش هارجع البيت ده تانى، وقتها كان عندى 12 سنة، نزلت الشارع وبقيت بمسح عربيات وبشتغل فى قهاوى وببيع مناديل، عشان بس أقدر أعمل 10 جنيه فى اليوم يا دوب أجيب بيهم وجبة ولا اتنين، ده لو العيال ولاد الشارع الأكبر منى، واللى بيسموهم القواد، ما أخدهومش، وفضلت من غير أكل».
كان على يتكلم عن الشارع وحياته فيه بحزن من يسترجع أقسى لحظات حياته.. «فى حاجات مينفعش تتقال.. بس أنا كنت هادى ومش بعرف أرد أذى حد، وده خلانى أتأذى أكتر.. مكانش ليا أى مأوى، كنت بروح الجمعيات اللى بتعمل نظام الإقامة المؤقتة، كنّا بنقعد فيها لغاية الغدا، وبعدين نرجع للشارع، لغاية ما ييجى الليل، ونبات فى أى جامع فاتح، أو فى الشارع..
كنت عايز أخلص من العيشة دى بأى طريقة، كان نفسى أخلص من البلد كلها وأهج أروح فى أى حتة، مكنتش بفكر غير فى السفر، وده كان يلزمه إنى أخلص ورق التجنيد، وسط ده كله شفت المشروع اللى أحمد عمله، وسمعت منه ومن الناس فى الجمعية اللى فتحت له المشروع واللى كنت بروحها أنا كمان، أد إيه حياته اتغيرت، قعدت أفكر هو أنا ممكن اترحم من حياة الشارع؟ وما ارجعلوش تانى؟ مكنتش مصدق إنى ممكن اترحم من كل ده».
يعلق رياض أبوزيد- استشارى العمل الميدانى باليونيسيف- قائلا: «فتحنا هذا المحل منذ نحو أربعة أشهر، قمنا بتأجيره لمدة عامين بعقد إيجار جديد، ودفعنا تأمينه، وملكناه لأحد الأولاد كان عمره نحو 24 عاما، وكان أحد القادة فى الشارع أيضا، وأعطيناه ثمن البضاعة ليملأ محله ويبدأ العمل، لكن الولد ضعف عندما وجد مبلغا كبيرا من المال فى يده، وبعد أن عمل نحو ثلاثة أشهر فى المحل، عاد لأصدقائه الذين كان يعرفهم من الشارع، وترك المشروع وهرب ومعه 900 جنيه أنفقها على المخدرات، لم يكن هذا غريبا، فنحن كنّا نتوقع حدوثه، لأننا قررنا أن نبدأ المشروع مع أكبر وأصعب فئة من أولاد الشوارع..
بعدها ومنذ شهر واحد قررنا أن ينتقل المشروع لعلى، وكان الولد مرحبا ولديه استعداد هائل لبدء العمل، وبالفعل غيرنا عقد المحل باسمه، لكن حظه إنه قد بدأ برأسمال قليل، وعلى محل ثقة إلى حد كبير، لأنه هادئ وأمين، ونحن ندرك أن ما تعرض له بسبب هدوئه هذا كان أصعب من أن يحتمل، لذلك نعرف أنه لن يعود للشارع أبدا إذا توفرت له حياة كريمة».
يضيف على: «بافتح محلى الساعة 8 الصبح كل يوم، واقفله الساعة 12 بالليل، وبافضل طول اليوم اشتغل، وبنام فى المحل، بفرش حاجة على الأرض وأنام عليها، لغاية ما ربنا يسهل ودخلى يزيد وأقدر أجيب أوضة أسكن فيها، بكسب حوالى 900 جنيه فى الشهر، بطلع منهم 350 جنيه إيجار المحل وبشيل جزء لأكلى، والباقى بزود بيه بقالة فى المحل عشان المكسب يكبر وأعوض نقص رأس المال اللى بدأت بيه، نفسى أقدر أكبر المحل الصغير وأخليه سوبر ماركت، وده مش بعيد لأنى براعى ربنا فى شغلى».
«أنا ماكنتش بشرب مخدرات وأنا فى الشارع.. بس كنت بشرب سجاير كتير، دلوقتى بطلتها ومبقيتش بشرب شاى كمان، الناس اللى فى الشارع هنا بيعاملونى كويس أوى، واحدة ست ساكنة فى البيت اللى جنب المحل ده، كل أول شهر لازم تجيبلى لبس جديد، ده غير وجبات الأكل اللى بتتكفل بيها هى وناس تانيين.. من ساعة ما بدأت اشتغل عرفت إن مش كل الناس وحشين.. استحالة أرجع للشارع تانى».