أيها الشعب الفلتان

واقترب ميعاد العلاوة.. وبدأت الحكومة موسم ادعاء الفقر وعشانا عليك يا رب ويا بخت من بات مظلوم ولا بات ظالم.. وها هى وزارة المالية تعترف بزيادة الدين الداخلى والخارجى وتراجع الإيرادات.. وفى بيان رسمى أعلنت عن تدهور الأرقام بشكل يوحى إليك أنها غالبا ستطلب من الشعب أن يدخل معها فى جمعية بشرط أن تقبضها هى الأول.. ولكنك أيها الشعب لا تستاهل علاوة ولا غيره.. وبصراحة أيها الشعب أنا زعلانة منك.
كده برضه يا شعب؟.. ده كلام؟!.. تطالب بعلاوة وتطالب برفع الحد الأدنى لأجرك وتنادى بعدم إلغاء الدعم وتعترض على التفريط فى تأميناتك وترفض استثمار معاشاتك فى بلاد برة، وإنت أتاريك بتضيع فلوسك على الخمرة والنسوان؟
من فضلك لا تنكر أيها الشعب.. وزير المالية صرح بهذا وهو بالذات دوناً عن بقية زملائه لا يكذب أبداً.. وبصراحة هو قاللى إنه كان بيمشى وراك بالليل أيها الشعب الفلتان وياما شافك متلبس وانت قاعد فى خمارة الخواجة «ينى» والكأس فى إيدك اليمين والمُزة قاعدة تدلع على رجلك..
وقد صرح الوزير بأنه على أتم استعداد أن يأتى بشهود كانوا معه وهو يمشى خلف الشعب بالليل ورأوا معه الشعب وهو يدخل الخمارة فى انصاص الليالى كما رأوا بأعينهم المزة فى حضن الشعب.. ثم تأتى بعد ذلك أيها الشعب الفلتان وتسأل عن الدعم؟ دعم إيه اللى انت جاى تقول عليه؟!..
ألا تدرى أنك أنت أيها الشعب الفلتان السبب الرئيسى فى أن الدعم لا يصل إليك؟.. طب هيجيلك فين وانت على طول قاعد فى الخمارة سكران؟.. ولعلمك أيها الشعب إنت السبب فى تدهور نظر هذا الوزير الغلبان.. فاكر من كام شهر لما كنت سهران فى الخمارة تأربع كونياك وسكران؟ حتى بالأمارة كانت تحية كاريوكا بترقص ومحمود المليجى وشلته كانوا قاعدين على الترابيزة اللى جنبك، فاكر؟
إنت انسجمت مع المزيكا وحبيت تقوم ترقص مع الست تحية، فشعر محمود المليجى بالغيرة وماعجبوش المنظر وقال : «إلا سمارة يا واد يا شعب».. ونظر لتوفيق الدقن اللى ناوله إزازة فاضية راح المليجى كاسرها على حرف الترابيزة وتوجه ناحيتك برقبة الإزازة.. وانت كنت تعطيه ظهرك وبترقص بالعصايا مع الست تحية، ولسه المليجى هيرفع رقبة الإزازة عليك راح هاجم عليه وزير المالية وقاله: «عندك يا مليجى.. إلا الشعب».. قام هجم عليه توفيق الدقن واتلم صبيان المليجى عليه وانت أيها الشعب الجبان بدل ما تدافع عن وزيرك استمريت فى الرقص مع الست تحية ولم تلتفت لما يدور..
وفجأة.. واحد من صبيان المليجى مسك ذراع الوزير من اليمين والتانى من الشمال وكتّفوه وثبتوه أمام المليجى الذى توجه ناحيته مع ازدياد صوت المزيكا وهجم على الوزير بقبضة يده ببوكس شديد فى عينه مما اضطر الوزير أن يعالجها فى الخارج على نفقة الدولة.. كل هذا وانت مستمر فى الرقص مع الست تحية وسكران.. ثم تأتى بعد ذلك تتنطط وتطالب بعلاوة وتتشرط فى نوع الدعم؟!
 طب لعلمك بقى أيها الشعب إن هذا الوزير خسارة فيك وهو اللى ياما ستر عليك ومن الآن فصاعداً لا تسأل عن علاوات ولا تأمينات ولا معاشات وأبوك السقا مات.