سيادة الوزير: وانت مالك؟

أسبوع واحد مفيش غيره امتنعت عن القراءة وبالطبع من ضمنها قراءة الصحف.. ورغم أن السبب كان مرضياً فإننى كنت سعيدة بالراحة النفسية فى البعد عن الأخبار.. وحاولت ألا أعوض هذا البعد بالقرب من برامج التليفزيون إياها.. وكان أسبوعاً جميلاً جداً والله ورغم أن المنطق يقول إن عدم اطلاعى على الأحداث لن يمنع حدوثها فإننى استعبطت واعتبرت أن الأسبوع كان هادياً خالياً من الأحداث المؤسفة التى تتواصل حولنا يوماً وراء يوم..
وللأسف عادت عينى للعمل بعد انتهاء العمرة وفتحت الصحف أمس الأول فقط وكانت أخبار يوم واحد فقط كالآتى: لحمة هندى مصابة بأكياس دودة «الساركو» وصور للحوم مصابة بالديدان نفسها وهى حية ترزق فى ميناء الإسكندرية فى رسائل محجوزة والله أعلم كم من رسائل التهمها الشعب المصرى المفترى اللى مطلع روح الحكومة.. وهل التهم لحمة بالأكياس ولا بالديدان؟ ويا ترى مين فيهم الأحلى؟..
أصل يا اخوانا الهنود شعب يعبد الأبقار ولما تعجز ويصل عمرها إلى خمسة عشر عاماً يضطرون اضطراراً لذبحها وبالمرة يستنفعوا بحق اللحمة طالما يوجد فى الدنيا شعوب زينا كده.. عندهم وزارات زى اللى عندنا ومستوردين زى اللى عندنا.. العملية سهلة خالص.. وياريتها جت على قد كده.. قال لك إيه: فيه لحمة جت من أمريكا اللاتينية مصابة بنوع حلزونى من الديدان الضارة..
وبرضه مش مشكلة ما احنا أكلنا قمح بالسوس والسموم والحشرات فترة كويسة وما حصلش حاجة.. أما أخبار العنف فى المدارس فهى شغالة الله ينور والآن يوجد تطور لم يكن موجوداً من قبل وهو دخول الأهالى طرفاً فى العنف فهم يا إما بيضربوا، يا إما بينضربوا، أى أن أطراف العنف أصبحوا ثلاثة «مدرسين».. «طلبة».. «أهالى» وكل يوم تتوالى الأخبار عن مصابين وقتلى من الأطراف الثلاثة..
 وكل هذا من ساعة الوزير ما أطلق أول تصريح له عن «هيبة المعلم» وياريت كفاية تصريحات لأن لو الحال استمر بالمعدل ده تصريح كل يومين هايخلص على ربع الشعب المصرى فى سنة دراسية واحدة ومن غير تطوير كمان.. أما بالنسبة لعلاج الفقراء على نفقة الدولة التى شطب عليها نواب الشعب ولم يتبق منها شىء تقريباً من ميزانية السنة دى فقد تقرر نقل المجالس المتخصصة من مكانها الذى يجاور مجلس الشعب ووزارة الصحة إلى مكان بعيد فى مدينة نصر وإيه، مزود بالكاميرات.. وهنا توقفت ولم أفهم.. الكاميرات هتصور إيه؟!
وهل التجاوزات والهبر والفشل والتربح والدعاية الانتخابية المجانية والكوسة كلها تحدث فى المجالس فقط؟! ولّا يمكن الكاميرات هتصور المريض مع الأطباء أثناء الكشف الطبى؟! الله أعلم.. كل شىء فى بلدنا جائز.. على العموم أنا عذرت النواب فى التربح من النفقة السايبة اللى مالهاش صاحب.. الجماعة عندهم قضايا ولازم لهم محامين وكفالة ومصاريف اللى عنده تهريب موبايلات واللى رشوة واللى سب وقذف واللى قروض وتربح إلخ... إلخ.. معذورين فعلاً.. خبر آخر عن شركة طنطا للكتان التى تنوى الحكومة بيعها برخص التراب لثرى عربى يعملها كنتاكى ويلقى بالألف عامل فى الشوارع..
 تصوروا إن صناعة الكتان دى ازدهرت وتألقت أيام «محمد على» وهى أقدم صناعة نسيج فى العالم، وأول من بدعها هم المصريين، دلوقتى الناس ومصانعها وشركاتها بيتباعوا زى أراضى توشكى اللى بيسقعها «الوليد» عشان الحر جاى جامد السنة دى.. وآخر حاجة لطيفة جداً هى تصريحات د. بطرس غالى.. قال إيه: «إنه ممكن يقبض مشتركى التأمينات فلوسهم بس على الله ما يروحوش يسكروا بيها ويضيعوها على الخمرة» وطبعاً هو تأدباً ماكملش.. و«النسوان»..
 والحقيقة د. بطرس غالى، وزير المالية، دمه خفيف وعاوز حد دمه خفيف يرد عليه ويقول له: وحضرتك يعنى.. سورى ومعاليك يعنى إيه دخلك؟! وانت مالك يا أخى، يسكروا بيها ولا يشربوا بيها بانجو ولا يتجوزوا ولا يقطعوها ويعملوها عصافير الجنة.. فلوسهم ولا مش فلوسهم؟! ولا اللى داخل جيب المالية مفقود ورده خسارة؟! ولا إيه بالظبط؟! ياريتنى ماخفيت ولا قريت الجرايد.. صباح الفل.