حلال ولاّ حرام

مسحراتى مصر البهية
اصحى وسبّح رب البرية
مشيت أرتّل وأنشد وأجوّد
وصوتى يجرى بين النواصى
هنا بانقّر.. هنا باعوّد
هنا باحوّد عن المعاصى
لو كنت بحرى
لازم أقبّل
وإن كنت قبلى.. لازم أبحّر
ولحد آخر نفس فى صدرى
هاشد قلبى وتر وأسحر
يا مصر قومى وشوفى نيلك
يا مصر قومى وضمى سينا
نهر المحبة بينتمى لك
يا مصر شوفى إحنا فين رسينا
مصر البهية.. بالعقل هية
ف الذكر آية.. ف العشق غية
اصحى وسبّح رب البرية..
مسحراتى قام
فى ميعاده بالتمام
وقال هامشى وأسحر
بكلمتين قدام
كلام محفوظ وقولته
للناس على الدوام
لكن الأهم من دا
الفعل مش الكلام
سأل نفسه سؤال
ف غاية الاحترام
اللقمة اللى باكلها..
حلال ولاّ حرام؟!
الحاج راضى.. راضى
مالوش ف الهلس ماضى
ما يقولش كلمة فاضية
ولا يرضى لهو فاضى
بيحج كل عام
ولا يتلط ف قواضى
صلا وزكاة وصيام
وبينهب الأراضى
ويقولك دية نقرة
والتانية نقرة غيرها
دى أرضنا ف بلدنا
واحنا الأولى بخيرها
يا عالم فهمونى.. بالذمة ده كلام؟!
اللقمة اللى بياكلها.. حلال ولاّ حرام؟!
ميكانيكى ف إيده صنعة
تأكّله الكباب
أروح له وعينى والعه
من خبطة ف الجناب
يقولّى دى الكبالن
دخلالك ف الدولاب
والأكس كمان مطقطق
والزيت بيجيب هباب
والتيل الخلفى ممكن
يأثر ع الفرامل
بعدين ترجع تقولّى
الشغل ماكنش كامل
سيب العربية جُمعة
وتعالى بالحساب
- دا كتير دا يا اسطى جمعة
يحلف لك ع الكتاب
وقفت عليه بالخسارة
حتى اسأل الشباب
تمشى..
يقول الشطارة
ف تقليب الزبون
مادام غشيم هايدفع
ويشيلك ف العيون
يا عالم فهمونى بالذمة ده كلام؟!
اللقمة اللى بياكلها.. حلال ولاّ حرام؟!
ليّا صديق محامى
إنسان صاحب رسالة
يقدس القانون كخادم للعدالة
له جار كمان محامى
يقولك استحالة
إحنا قانونا خادم.. لراحة الزبون
تقول له فيه محاكم.. يقولك شىء يهون
أنا عندى سكة تانية.. مع بعض المُحضرين
وهاتعيش القضية.. أقلة عشر سنين
وإحنا بنقبض ما تعرف.. اللى هايكسبها مين
يا عالم فهمونى.. بالذمة ده كلام؟!
اللقمة اللى بياكلها.. حلال ولاّ حرام؟!
مسحراتى ف الذكر هايم
والنسمة حلوة ولا حد نايم
والكل صابح معانا صايم
ف الفجر يدعى ويقول يارب
رمضان يا أكرم م الشمس ذاتها
أرواحنا عندك تبدأ حياتها
والنفس راضية تلحق ما فاتها
تطلب هداية وتقول يارب
المصرى بنّا وفلاح وجندى
وعندى جامع.. وكنيسة عندى
الرحمة من دا.. والحب من دى
ومن قلوبنا بنقول يارب