أزمة جديدة تهدد الدوري المصري.. شوبير يكشف التفاصيل

كشف الإعلامي أحمد شوبير عن أزمة جديدة تهدد مباريات الدوري المصري، القادمة بعد إعلان الاتحاد الإفريقي مواعيد مباريات الفرق المصرية المشاركة في البطولات التي ينظمها «كاف».
وقال شوبير في تصريحات إذاعية: «عندي مشكلة وعندي حاجة كويسة كمواطن مصري، الاتحاد الإفريقي حدد مواعيد أول جولتين للأندية المصرية في بطولتي أفريقيا للأندية».
وأضاف: «حسب المواعيد المحددة للأهلي والزمالك وبيراميدز والمصري بالتأكيد هيكون في تأجيل إجباري لمباراة المصري مع وادي دجلة، لأنه هيلعب هنا يوم 23 مع كايزر تشيفز وبعدين هيسافر زامبيا يوم مثلا 25 خلاص المباراة دي تأجلت».
وتابع: «طيب الزمالك المفروض يلعب مع سموحة يوم 25 وهيلعب مع كايزر تشيفز يوم 29، وأعتقد صعب جدا يسافر ويلعب والأقرب هو برضه التأجيل لأن السفر هيكون حوالي 12 ساعة».
وواصل: «الأهلي المفروض يلعب يوم 25 مثلا مع الإسماعيلي نفس الثقة وهكذا بيراميدز، وهنا ربنا يكون في عون الجماعة بتوع رابطة الأندية شوف بقا لأنك جبت شركة المانية جبت شركة نيوزلندية الكاف مواعيده مش بتبقي مظبوطة».
وأنهى: «يعني مثلا شوفنا لاعبي بيراميدز امبارح سابوا عادي المعسكر وكابتن حلمي طولان قال أنا هعمل ايه، وهنا في أزمة في هذا الأمر ودي أزمة الدوري العام والرابطة وغيره والرابطة هنا مش هتقدر تعمل حاجة وهتصعب المسابقة».