«أنا متربتش على كده».. شيكابالا يفجر مفاجآت ويكشف مخطط عبد الواحد السيد للإطاحة بمدرب الزمالك

كشف محمود عبدالرازق «شيكابالا»، قائد الفريق الأول لكرة القدم بنادي الزمالك السابق، مفاجآت بشأن ما تردد عن تدخله لإقالة السويسري كريستيان جروس، من تدريب الفريق الأبيض.
وقال «شيكابالا»، خلال حواره ببرنامج «الكورة مع فايق»، المذاع عبر فضائية «ام بي سي مصر»: «عبدالواحد السيد (مدير الكرة السابق بنادي الزمالك)، جالي وقالي (احنا لازم نقعد مع رئيس النادي النهاردة، الراجل ده لازم يمشي، عشان بعض الأمور)».
وأضاف: «ممكن كلام عبدالواحد السيد، يبقى صح أو غلط دي مش قصتي، في لعيبة قبلها كانت قالت للكابتن حسين لبيب، المدرب عنده مشاكل».
وأوضح: «قولت للكابتن عبدالواحد (أنا أسف أنا القعدة دي مش هقعدها، عشان الشارة اللي أنا بلبسها دي هتبقى عيب في حقها وعيب في شعار النادي اللي أنا لابسه إن أنا أقعد مع رئيس النادي أقوله الكلام ده على المدرب اللي أنا بتمرن معاه كل يوم، ده بالنسبالي عشرة أنا متربي كدة».
وواصل؛ «أنا لو عايز حاجة هروح للمدير الفني أقوله، وقولت لعبدالواحد السيد( أنا مش هقعد القعدة دي وهتبقى باينة للناس إن أنا طعنت الراجل، أنا مش هعمل كدة أنا متربتش على كده، فأنا مش هقعد القعدة دي لو في حاجة ممكن تقول للكابتن حسين، وتيجوا تقعدوا مع الفرقة كلها ونشوف الحلول إيه، دي هعملها لكن إني أروح أقعد لواحدي لأ)«.
وواصل: «قولت لعبدالواحد السيد. لو أنا روحت قعدت القعدة دي بعدها بثلاث دقائق هيتقال عليا (الخاين، اللي عمل المؤامرة على المدرب)، أنا حذرت وفي لعيبة شاهدة على كلامي، روحت البيت لقيت اللي أنا حذرت منه الناس بتطلع تقوله، كابتن الزمالك مش كده، أسطورة ناديك مش كده، لو أنا كده مكنتش هوصل للحتة اللي أنا وصلتلها حاليًا»