رامي ربيعة: "لن ألعب للزمالك.. والجزيري قالي المدرب اتعامل غلط"

تحدث رامي ربيعة، لاعب الأهلي عن أول مباراة له مع الفريق الأول وعلاقته بجماهير الزمالك موضحًا موقفه من الانتقال للغريم التقليدي.
قال ربيعة خلال تصريحات تليفزيونية على قناة إم بي سي مصر: "أول مباراة ليا مع الفريق الأول للأهلي كانت أمام الزمالك وانتهت 3/3، كان فيه لاعيبة كبار زي أبو تريكة مكنوش عارفين اسمي في الماتش وبيقولولي يا كابتن إلعب".
أضاف بخصوص بطولاته مع الأهلي: "طالما في النادي الأهلي، يبقى مش عارف أنا كام بطولة، طبيعي اللي بيدخل النادي الأهلي بياخد بطولات، خالد عبد الفتاح لسه جاي من سموحة وخد أفريقيا ودوري وراح كأس عالم".
تابع: "جمهور الزمالك كبير ومحترم، كنت بتكلم مع سيف الجزيري آخر ماتش قمة محدش مبسوط من شكل الزمالك في آخر دقيقة، قولت للجزيري انتوا المفروض تلعبوا كده من الأول، عايزين الزمالك أحسن لأن المنافسة في مصلحتنا وطبيعي كلنا نلعب ونعوز نفرح جمهورنا، أمتع ماتش بالنسبالي كان في الإمارات السوبر لما كسبنا 3/2 كان ماتش قوي وحماسي".
كشف حديث سيف الجزيري معه، قائلًا: "قالي المدرب اتعامل غلط بس إحنا بنعمل اللي علينا في الملعب عشان نفرح الناس والجمهور".
أكمل عن مفاوضات الزمالك معه: "مجاليش عرض رسمي من الزمالك، لكن حازم فتوح كلمني قالي لو إنت حاسس انهم مش هيجددوا معاك الزمالك عايزك، قولتله الزمالك فريق كبير ومحترم بس أنا مرتبط بالأهلي من صغري، كل سنة بمضي على بياض وأخر مرة أنا مضيت ومش عارف هاخد كام".
اختتم: "حتى لو مشيت من الأهلي هروح برا مصر الإمارات أو السعودية، عمري ما اخسر جمهور الأهلي أو تاريخ الأهلي، أنا عملت تاريخ مع الأهلي الموضوع مش فلوس دي قيمة واسم ولن ألعب للزمالك".