«كتبت أغاني وأنا على جهاز التنفس».. منة عدلي القيعي تكشف عن معاناتها 7 أشهر وتعرضها لحادث

كشفت الشاعرة الغنائية منة عدلي القيعي، عن معاناتها لمدة 7 أشهر من صعوبة التنفس وتعرضها لنوبات اختناق، وتعرضها لحادث سير لكنها نجت منه.
وكتبت منة عدلي القيعي عبر حسابها على «فيسبوك»: «حكاية ماكنتش ناوية احكيها.. بس هحكيها.. من 7 شهور واحنا لسه بنسخن عشان نحضر لشغل رمضان، حسيت بصعوبة في التنفس كانت بتزيد كل يوم إلى أن تحول الموضوع لنوبات اختناق تقريبا.. كانت بتتسبب في تسارع في ضربات القلب توصل ل 180 أو 190 وأوقات كتير الموضوع كان بيطول كنت بحس إني مش هعديها».
وأضافت: «بعد شهر واتنين من الفحوصات والتشخيصات المختلفة جالي نوبة من دول وأنا سايقة وتسببت في حادثة كانت صعبة شوية، راحت فيها عربيتي والحمد لله برضه نجوت منها بإصابات خفيفة وكنا بنحمد ربنا ألف حمد… بعدها الأمور تدهورت أكتر، والنوبات كانت بتوصل لمرتين و3 و5 في اليوم الواحد، فيه أيام كنت بوقف عربيات ناس ماعرفهاش في الشارع واقولهم خليكوا معايا من الخوف».
وأشارت «منة» عن رحلة علاجها قائلة: «وابتديت رحلة علاج طبيعي للتنفس وكنت حرفيا بتعلم إزاي اتنفس من الأول، واليوم اللي كنت بتنفس فيه صح لدقيقة متواصل كنت بعيط من الفرحة.. ويوم بيعدي ويوم أحس أنه مابيعديش لحد ما وصلنا لهنا».
وتابعت «منة»: «ال 7 شهور دول هما اللي ربنا كرمني فيهم بالأغاني دي… صاحبي يا صاحبي وكل سنة وتقابل حبيب وإلى أخره من الشغل اللي اتعرض في رمضان 25، أغاني منهم اللي اتكتبت وأنا في مستشفي واللي اتكتبت وأنا على جهاز تنفس واللي اتكتبت وأنا بعيط … فيه ايام من الإحباط كنت بفكر أبطل أحاول أخف، بس عمري ما فكرت أبطل كتابة، وكنت بدعي ربنا يكرمني ويجازيني وكنت بكلمه وأقوله يارب وقفني ووقفني على رجلي تاني».
واختتم: «اللهم لك ألف حمد وشكر 7 جوايز حصيلة 7 شهور مروا بكرم الله ولطفه… (فيه جايزتين مش معايا).. شكرا لأهلي وعيلتي وجوزي وصحابي والناس اللي اشتغلت معاهم كلهم…طلعت عنيكوا وقلقتكوا وعملتلكوا إزعاج واستحملتوني… شكرا من كل قلبي».
View this post on Instagram
A post shared by Menna el kiey منة القيعي (@mennaelkiey)
اقرأ أيضًا:
«غريب جدا».. منة عدلي القيعي تروج ل أغنية «دنيا ملبشة» بطريقة طريفة