عمر الفاروق

مسحراتى مصر البهية
اصحى وسبح رب البرية
مشيت ارتل وانشد واجود
وصوتى يجرى بين النواصى
هنا بانقر.. هنا باعود
هنا باحود عن المعاصى
لو كنت بحرى
لازم اقبل
وإن كنت قبلى.. لازم أبحر
ولحد آخر نفس ف صدرى
هاشد قلبى وتر واسحر
يا مصر قومى وشوفى نيلك
يا مصر قومى وضمى سينا
نهر المحبة بينتمى لك
يا مصر شوفى احنا فين رسينا
مصر البهية.. بالعقل هية
ف الذكر آية.. ف العشق غية
اصحى وسبح رب البرية..
■ ■ ■
مسحراتى صاحب رسالة
أول حروفها عايزين عدالة
تشبه عدالة عمر الفاروق
عايزين عدالة عمر.. وأعدل
الأرض تصبح م الجنة أفضل
والحب يسرى جوه العروق
رفع العدالة فوق المعالى
رد المغانم من كل والى
عمل الولاية مغنم وسوق
القبطى راح له يشكى له حاله
من ابن حاكم ظلم عياله
قال: دين محمد رد الحقوق
أعلنها ثورة فوق المنابر
وخد له حقه من الأكابر
محكوم وحاكم مافيش فروق
ف القدس صلى بره الكنيسة
بحق مريم وحق عيسى
شوف احترام المقام.. وفوق
مدام بيعدل من غير متاجرة
نام الخليفة ف ضل شجرة
ما بين سكينة وبين هدوء
علشان صلاتك يقبلها ربك
والقبلة تقبل وجهك وقلبك
خلى العدالة هيه الوضوء
■ ■ ■
مسحراتى ف الذكر هايم
والنسمة حلوة ولاحد نايم
والكل صابح معانا صايم
ف الفجر يدعى ويقول يارب
رمضان يا أكرم م الشمس ذاتها
أرواحنا عندك تبدأ حياتها
والنفس راضية تلحق مافاتها
تطلب هداية وتقول يارب
المصرى بنا وفلاح وجندى
وعندى جامع.. وكنيسة عندى
الرحمة من دا.. والحب من دى
ومن قلوبنا بنقول يارب